اسلام آباد۔ 18 فروری (اے پی پی) وزیراعظم عمران خان پارینے کہ کورونا نا دین آن پد ہم ساڑی حکومت دونیم سال اٹی 20 ارب ڈالر نا پیشن نا وام تے پدی تسنے ہرااسہ ریکارڈ اسے، 6 ہزار ارب روپئی وام تا قسط آتے ادا کرینن۔ ملکی زرگزران مثبت کںڈآ ہِننگ ءِ، بینک لس بندغ ءِ اُراتا تفنگ کن وام فراوان کیر۔ پیشن نا ملک پاکستانی تےروشن ڈیجیٹل اکاؤنٹ نا بارواٹ معلومدار کننگ کن تشہیری مہم اس چلیفر، پوسکن ءُ ٹیکسٹائل مل لگنگ ءِ، صنعتی شار تیٹی ورکر ملیپننگ ءِ، دابھاز بھلو بدلی اسے، 20 ارب ڈالر نا تاریخی نسخان میرات اٹ ملا، روپئی نا قدر انا تمنگ آن ہرگڑا کبین مس۔ اوپنچ شنبے نادے آ داڑے روشن ڈیجیٹل اکاؤنٹ نا کمک اٹ گدریفوک آ ترسیلات زر 500 ملین ڈالر آن ودنگ نا وخت آ اڈہلوک آ دود آن تران کریکہ۔ سلاہکار خزانہ عبدالحفیظ شیخ، وزیر خارجہ شاہ محمود قریشی تون اوار بنجائی وزیر آک، سلاہکار و خصوصی کمکارو بینک آتا سروک آک ہم داوخت آ ساڑی ئسرک۔ وزیراعظم پارے کہ اودود اٹی بشخ ہلوک کرکٹرو بینکر آتے بخیر اٹ پاہک و اسٹیٹ بینک انا گورنر ءِ مبارکبادی ایتک کہ روشن ڈیجیٹل اکاؤنٹ نا کمک اٹ ترسیلات زر 500 ملین ڈالر آن ودانے، دابھلو سرسہبی اسے انتئے کہ نن بھلو وخت اسے آن کوشست کرینہ کہ سمندرآن ایپار پاکستانی تیان فائدہ ہرفنگے۔ وزیراعظم پارے کہ ای 20 سال آن پاننگ اُٹ کہ سمندرآن ایپار پاکستانیک ملک اکن بھاز بھلو میرات اسے ءُ۔ کنا اوفتے تون کرکٹ و شوکت خانم ڈٹ انا سوب آن ہمیشہ آن رابطہ ءِ و دا ننا بھاز بھلو پوٹینشل اسے۔ وزیراعظم پارے کہ ہراتم نن اقتدار ءِ سنبھالان تو کرنٹ اکاؤنٹ نسخان ننکن بھاز بھلو ویل اس ئس، ملک اٹ ڈالر کم بسکہ و پیشن بھاز ہناکہ، 20 ارب ڈالر نا تاریخی نسخان میرات اٹ ملا، داڑآن ملکی کرنسی نا قدر تمک و ہراتم کرنسی نا قدر تمک تو غریب آ اونا غٹ آن زیات اثرتمک انتئے کہ ہر گڑا کبین مریک، ڈالر 107 آن ہراتم 160 آ ہنا تو پٹرولیم مصنوعات، خوردنی تیل، کنوئی آ گڑا، دال ہراہفتاد درسد پیشن آن بریرہ، تون اوار ہر گڑا کبین مس ہراڑآن خاص وڑاٹ تنخواہ دار تپہ بھاز زہمی مس، ننے داوڑاٹ تینا زرمبادلہ نا کوڑی تے ودفنگ و زرکاری نا گرج ئس۔ برآمد آتا وددفنگ و مریس مد کسرئس۔ وزارت واپار ءِ مبارکبادی ایتیوہ کہ ملکی برآمد آک داوڑحالیت آتیٹی ودار ہراتم مچ آ دنیا و ڈیہہ نا ایلو ملک آتا برآمد آک شیف ہنارہ و کورونا نا دین اناہم مون تروک ئس، پاکستان نا صنعتی شار فیصل آباد، گوجرانوالہ، سیالکوٹ اٹی ورکرملیپننگ ءِ و پوسکن ءُ مل لگنگ ءِ، دا بھاز بھلو بدلی اسے، روپئی نا قدر ءِ سوگو کننگ اٹ اسٹیٹ بینک انا روشن ڈیجیٹل اکاؤنٹ نا بھلو کڑد اسے و دابھاز بھلو سرسہبی اسے۔ وزیراعظم اسٹیٹ بینک ءِ پارت کرے کہ سمندرآن ایپار پاکستانی تتون رابطہءِ برقرار تخنگے و اوفتا ویل آتا ایسری کن سیل اس جوڑ کننگے، اوفتیکن آسراتی ودی کننگے، خاص وڑاٹ ہندن ءُ گام گیج کننگے کہ پیشن نا ملک پاکستانی ورکرآسانی اٹ تینا پیسہ غاتے پاکستان آ گدریفنگ کے۔ وزیراعظم پارے کہ 97 ملک آتیٹی روشن ڈیجیٹل اکاؤنٹ نا رداٹ 88 ہزار اکاؤنٹ ملنگانے، اگہ دا داکچ اٹ ودسا ہنار تو بھازبھلو بدلی اس بریک۔ وزیراعظم پارے کہ داتم اسکان اونا حکومت ریکارڈ وام تے پدی کرینے، تاریخ اٹ اسہ حکومت اس ہم داخہ در وام پدی تتنے۔ دونیم سال اٹ نن 20 ارب ڈالر پدی تسونن و 6ہزار ارب وام تا قسط انا مد اٹ ادا کرینن۔ وزیراعظم پارے کہ داخہ در بھلا وام تیان پد ہم داخہ در بھلن زر تننگ معجزہ اسے۔ داسہ ننا اقتصادی ٹک آک گچین مسنو۔ کورونا نا اثرآتیان پد ہم گچینی نا کنڈآ ہِننگ ءُ۔ بھارت نا اکانومی 10 درسد و انگلینڈ نا 300 درسد زہمی مسنو ولے ننا زرگزران مثبت کنڈآ ہِننگ ءِ، ننے سمندر آن ایپار پاکستانی تیان فائدہ ہرفنگ کن پین سجفوئی ءِ۔ وزیراعظم اسٹیٹ بینک ءِ پارت کرے کہ الیکٹرانک میڈیا غا پیشن نا ملک پاکستانی تے روشن ڈیجیٹل اکاؤنٹ آن معلومدار کننگ کن مہم اس چلیفر۔ وزیراعظم بینک آتے حکومتی پروگرام اٹ بشخ ہلنگ آ خراج تحسین پیش کرے و اوفتیا زور شاغا کہ اوفک تینا ریکارڈ پرافٹ ءِ ملکی زرگزران نا شونداری کن کاریم اٹ اتیر و زیات آن زیات روشن ڈیجیٹل اکاؤنٹ ملنگ تون اوار اوار نیا پاکستان ہاؤسنگ اٹ ہم پبی کڑد ادا کیر۔ حکومت اُراتیکن وام تننگ نا کسر اٹ بروک کانودی اڑاند آتے مُرکرینے، داسہ بینک لسس و غریب بندغ ءِ ہم اُراتفنگ کن وام ایتر۔ مستین ناحکومت آک بیرہ اشرافیہ کن آسراتی تسر ولے ننا اولیت لس بندغ ءِ ہراڑتون اُراتفنگ نا پیسہ اف۔ اودے وام تننگے و سمال اینڈ میڈیم انڈسٹری کن وام تننگے۔ داکان بیدس وزیراعظم روشن ڈیجیٹل اکاؤنٹ و ایلو حکومتی ڈٹ آتیٹی نمان کارکڑد نشان تروک آ بینک آتا نمائندہ غاتیٹی اعزاز بشخا۔

متعلقہ مضامینمصنف کی طرف سے مزید