بنجائی کابینہ نا دیوان، سرکاری ملازم آتا تنخواہ تیٹی 25 درسد ودکی و چندی تقرری تا منظوری
اسلام آباد۔ 17 فروری(اے پی پی) بنجائی کابینہ بنجائی حکومت نا ملازم آتا تنخواہ تیٹی 25 درسد ودکی، یکم مارچ آن غٹ زرگزرانی سرجزآتے پورو وڑاٹ بحال کننگ و چندی تقرری تا منظوری ءِ تسنے، حکومت نا کوشست ءِ کہ بروک آ لس گچین کاریک الیکٹرانک وونٹنگ نا کمک اٹ مریر و سمندر آن ایپار پاکستانیک الیکٹرانک وونٹنگ اٹ بشخ ہلنگ کیر۔ صدر مملکت نا سلابت اٹ الیکٹرانک وونٹنگ مشین تا خلنگ کن درکار غٹ انتظامی گام گیج و مرحلہ غاتا پیدواری ءِ کننگے۔ کابینہ جنسی ڈوہ انا واقعہ غاتا سخت نوٹس ءِ ہلسا دابابت مون آ بروک آ رپورٹ آتیا گڑتی نا درشانی ءِ کرے۔ حکومت سینیٹ الیکشن اوپن بیلٹ انا کمک اٹ کرفنگ کن ہروڑ نا کوشست کننگ ءِ۔ سپریم کورٹ آن راہشونی، آرڈیننس نا اجراء و قومی اسمبلی ٹی ترمیمی بل پیش کننگ نا مسخت سینیٹ گچین کاری تے شفاف کننگ نا ءِ۔ ساڑی حکومت گچین کاری عمل ءِ پورووڑاٹ شفاف جوڑ کننگ کن سنبرینگوک ءِ۔ دا خیال آتا درشانی ءِ بنجائی وزیر حوالکاری و شینکاری سینیٹر شبلی فراز وزیراعظم عمران خان ناکماشی ٹی بنجائی کابینہ نا دیوان آن میڈیا ءِ بریفنگ ترسا کرے۔ اوپارے کہ بنجائی کابینہ ءِ کورونا دین انا حالیت و تالانی نا کچ انا بارواٹ حوال تننگا۔ کابینہ ءِ پاننگا کہ ملک اٹ کورونا نا کیس آتا کچ و تالانی نا کچ اٹی کمتی مننگ ءِ۔ کابینہ ءِ پاننگا کہ کورونا ویکسین فرنٹ لائن ورکرآتے خلنگ انگ ءِ۔ داتم اسکان کم وود پنجا ہزار فرنٹ لائن ورکرآتے ویکسین خلنگانے و دا عمل ءِ پین ترند کننگ انگ ءِ۔ کابینہ ءِ پاننگاکہ 65 سال آن زیات وئی نا بندغ آتیکن 1166نمبر فراوان کننگاہراڑے ویکسین کن او تینا شناختی کارڈ انا درج ورجسٹریشن ءِ کرفنگ کیرہ۔
