اسلام آباد۔ 17 فروری (اے پی پی) پاکستان و مصر واپاری و اقتصادی تعلقداری تے پین سوگو کننگ کن کثیر الجہتی بشخ آتیٹی ہڑتوم آ کنڈآتا کمکاری آ امنا کرینو۔ ترجمان دفترخارجہ نا رداٹ وزیر خارجہ مخدوم شاہ محمود قریشی چارشنبے نادے آ قاہرہ ٹی مصری ہم منصب سامح شکری تون اوڑدہی کرے۔ ہیت وگپ اٹی ہڑتوم آ کنڈآتا تعلقداری، پاکستان و مصر انا نیام اٹ کثیر الجہتی بشخ آتیٹی ہڑتوم آ کنڈآتا کمکاری نا مون آ دننگ تون اوار تین پہ تینی است خواہی نا باندات آ گپ وتران مس۔ شاہ محمود قریشی پارے کہ پاکستان، مصر ءِ عرب دنیا نا اسہ اہم ءُ ملک اس تکک، پاکستان و مصر انا نیام اٹ اسہ وڑ مذہبی و دودوربیدہ ئی قدر انا بنداو آ دیرینہ برادرانہ تعلقداری ءِ۔ اوپارے کہ پاکستان، مصر اتون ہڑتوم آ کنڈآتا تعلقداری تے پین سوگو کننگ کن سنبرینگوک ءِ۔ شاہ محمود قریشی پارے کہ پاکستان وزیراعظم عمران خان نا وژن ءِمون آ تخسا افریقی ملک آتون واپار نا مون آ دننگ کن ’’انگیج افریقہ‘‘ پالیسی آ روانءِ۔ وزیر خارجہ پاکستان و مصر انا نیام اٹ ہڑتوم آ کنڈآتا واپار و زرکاری ٹی ودکی نا دوئی وارخواہی تا بابت مصری وزیر خارجہ ءِ معلومدار کرے۔ وزیر خارجہ تینا مصری ہم منصب ءِ بھارت نا ہندوتوا سرکار نا پاکستان مخالف ناپاک عزم آن معلومدار کرسا اودے ڈیہہ نا امن و سوگوی کن گڑتی نا سوب گوندا۔ مصری وزیر خارجہ سامح ال شکری اوغانستان اٹی امن کن پاکستان نا مصالحانہ کوشست آتا ستاءِ کرے۔ ہڑتوم آ وزیر خارجہ غاک پاکستان و مصر انا نیام اٹ واپاری و اقتصادی تعلقداری تے پین سوگو کننگ کن کثیر الجہتی بشخ آتیٹی ہڑتوم آ کنڈآتا کمکاری ءِ ودفنگ آ امنا کریر۔ وزیر خارجہ دورہ مصر اٹی جم و جوش اٹ بخیر کننگ آ مصری ہم منصب نا منت واری ءِ ہرفسا اودے دورہ پاکستان نا سلہ خلک ہرادے او منت واری اتون امنا کرے۔
