اسلام آباد۔ 17 فروری (اے پی پی) وزیراعظم عمران خان شجرکاری ءِ پاکستان نا گچین آخبت کن المی گوندسا پارینے کہ حکومت ملک ءِ سرسوز و شاداب کننگ کن پبی گام گیج کننگ اٹی ءِ انتئے کہ چاگڑدی بدلی پاکستان کن بھلو گڑتی اسے۔ داخیال آتا درشانی ءِ او چارشنبے نادے آ شکرپڑیاں اسلام آباد اٹی جاپانی وڑآ شجرکاری نا ڈٹ انا بناءِ کرسا کرے۔ وزیراعظم پارے کہ شجرکاری بیرہ اسہ مشغلہ اس اف بلکن دا پاکستان نا بروک آ چین تے گچین آخبت و ساف ستھرا و جان جوڑ چاگڑد اس فراوان کننگ کن المی ءُ گام اسے۔ میاواکی جاپانی وڑشجر کاری ءِ ہرانا رداٹ روایتی وڑوڈول آتا جاگہ غا دہ ہنداخہ پین زیات ترندی اتون و سی ہنداخہ پین زیات پژغن جنگل خلنگ مریک۔ 10 ارب درخت خلنگ نا ڈٹ انا رداٹ اسلام آباد اٹی داوڑنا دہ ہند آتا پیدواری ءِ کننگانے ہراڑے جاپانی وڑانا شجرکاری کننگک۔ وزیراعظم پارے کہ پاکستان چاگڑدی بدلی تیان زہمی مروک آ دہ بھلا ملک آتیٹی اوار ءِ، ننے چاگڑدی چیلنج آتون مون تننگ کن دمدستی گام گیج کننگ نا گرج ءِ۔ اوپارے کہ لاہور و پشاور کون آمیٹرو پولیٹن شار وخت اس باغ تا شار پاننگارہ ولے آبادی و کچٹی نا ودنگ نا سوب آن دا شارک خرسی آن محروم مسر۔ اوپارے کہ تہو اٹی کچٹی نا سوب آن چناک و بھلاک بھاز زہمی مننگ ءُ و اوسط وئی 11 سال اسکان کم مننگ کیک۔ اوپارے کہ داحالیت داخاطرآن ودی مس کہ لاہور کون آ شار اٹی درخت آتے کاٹ کاٹسا شار ءِ کنکریٹ نا جنگل اس جوڑ کننگا دا حالیت آتے شجرکاری نا کمک اٹ بدل کننگ مریک۔ اوپارے کہ ننے چاگڑد دوست وڑانا زند اس اختیار کروئی مریک۔ شجرکاری و مخلوق نا ذہن تے بدل کرسا نن تینا راج ءِ گچین کننگ کینہ۔ اوپارے کہ پاکستان تحریک انصاف نا حکومت اسہ ارب درخت خلنگ نا ڈٹ ءِ سرسہبی اٹ پورو کرے و نن داسہ مچ آ ملک اٹی 10 ارب درخت خلنگ نا ہدف اس ہم دوئی کینہ۔ وزیراعظم سلاہکار موسمیاتی بدلی ملک امین اسلم و اونا ٹیم انا کاریم نا ستاءِ کرے و پارے کہ او ملک اٹ شجرکاری نا ڈٹ آتے سرسہب کننگ کن بھاز خواری کننگ ءُ۔ وزیراعظم ورناتیازور شاغا کہ تینا آخبت ءِ رکھوک کننگ کن حکومت نا شجرکاری مہم اٹ پبی وڑاٹ بشخ ہلیر۔ وزیراعظم پارے کہ تعلیمی نصاب اٹ شجرکاری ءِ اوار کننگ نا سلاہ غاہم سجفنگ انگ ءِ تانکہ اول وئی آن ورناتیٹی دا بابت شعور تالان کننگ مرے۔ وزیراعظم پارے کہ اسکول و کالج آتیٹی طالب علم آتے شجرکاری نا کنڈآن اتنگے و داچرجوئی ٹی اوفتا است بڈی ءِ کننگے۔ وزیراعظم پارے کہ نن غٹ اواری اٹ اسہ ہندن ءُ سرسوز و شاداب پاکستان اس جوڑ کینہ ہراٹی ننا بروک آ چینک گچین ءُ چاگڑد اسے ٹی زند ءِ تیر کننگ کیر۔ داکان مست وزیراعظم عمران خان شکرپڑیاں ٹی پڑس انا درخت اس خلسا ہتم نا موسم نا شجرکاری نا بناءِ کرے۔ بنجائی وزیر داخلہ شیخ رشید احمد، سلاہکار موسمیاتی بدلی ملک امین اسلم و سینیٹر فیصل جاوید ئسک ہم داوخت آ ساڑی ئسر۔
