اسلام آباد۔ 17 فروری (اے پی پی) بنجائی وزیر خزانہ ڈاکٹر عبدالحفیظ شیخ پارینے کہ پاکستان و جہانی مالیاتی فنڈ انا نیام اٹ معاہدہ غان مچ آ دنیا ٹی پاکستان نا برآمدات و ملک اٹی پیشن نا زرکاری ٹی ودکی مریک، پاکستان نا قومی خزانہ نا رکھ و ملکی دولت اٹ ودکی وزیراعظم عمران خان و اونا حکومت نا بنداوی ہدف ءِ۔ اوداہیت ءِ چارشنبے نادے آ داڑے الیکشن کمیشن نا پیشن میڈیا تون گپ وتران کرسا پارے۔ ڈاکٹر عبدالحفیظ شیخ پارے کہ درو پاکستان و آئی ایم ایف نا نیام اٹ اہم ءُ معاہدہ اس مسنے ہرانا سوب آن مچ آ دنیاٹی پاکستان نا برآمد آتیٹی ودکی مریک، ملک اٹی زیات پیشن نا زرکاری بریک و پاکستان نا اقتصادی شونداری ٹی کمک رسینگک۔ اوپارے کہ دا معاہدہ غان مچ آ دنیا نا زرکار و کیپٹل مارکیٹ پاکستان نا کنڈآ بریرہ۔ وزیر خزانہ پارے کہ ہرا گڑا پی ٹی آئی و اونا سرکڑدہ غاتے ایلوفتیان یکتا کیک او دادے کہ وزیراعظم عمران خان نا مفاد بیرہ اسٹ ء، اودادے کہ پاکستان نا مخلوق ءِ امر شونہال کننگے و پاکستان و اونا شاری تا عزت اٹ امر ودکی کننگے۔ اوپارے کہ پاکستان نا قومی خزانہ نا رکھ و ملکی دولت اٹ ودکی وزیراعظم عمران خان و اونا حکومت نا بنداوی ہدف ءِ۔ عمران خان نا ایلو خصوصیت دادے کہ او ہروڑاٹ تینا یا تینا خاہوت نا بزنس یا تینا و تینا خاہوت نا سیاستءِ پاکستان نا خزانہ غان زیات اہم تکپک۔ وزیر خزانہ پارے کہ غٹ انا است خواہی ءِ کہ سینیٹ نا گچین کاری تا جمہوری عمل جوان وڑاٹ پورو مرے۔ ہراسہ پارٹی و ہر اسہ بندغ ءِ جمہوری آجوئی ءِ کہ او تینا سلاہ ءِ تخے و داعمل اٹ بشخ ہلے۔ عمران خان و پاکستان تحریک انصاف سرسہب مریک۔
