کراچی۔ 17 فروری (اے پی پی) صدر مملکت ڈاکٹر عارف علوی قائد اعظم اکیڈمی نا لائبریری ٹی غٹ نایاب کتاب آتا ڈیجیٹلائزیشن نا گرج آ زور شاغسا پارے کہ اسکالرز و پولکار تا اوفتسکان رسینگ ءِ پین آسان کننگے۔ داخیال آتا درشانی ءِ او چارشنبے نادے آ قائد اعظم اکیڈمی کراچی نا دورہ ءِ کننگ نا وخت آ کرے۔ اوبابائے قوم قائد اعظم محمد علی جناح و برصغیر نا مسلمان تیکن اسہ جتاءُ وطن اس دوئی کننگ نا جہد اٹ اوار اونا رفقاء تا بابت پٹ وپول کن مرکز نا جوڑ کننگ نا ستاءِ کرے۔ اوپارے کہ داقومی تاریخ ءِ رکھ کننگ نا بھاز اہم ءُ پلیٹ فارم اسے ہراٹی بنداوی چکار پاکستانی دودوربیدہ، سماجیات، سیاست و ملکی تاریخ نا اقتصادی پلو آتا بابت پٹ وپول، اشاعت و مون آ دننگ آٹے۔ صدر مملکت اکیڈمی نا اولیکو ڈائریکٹر پروفیسر شریف المجاہد و ایلوفتے خراج تحسین پیش کرے ہرافک دادے اسہ فعال پٹ وپولی و اشاعتی ہند اس جوڑ کننگ اٹ کلیدی کڑد ادا کرینو۔ اواکیڈمی ٹی پٹ وپولی کاریم نا رفتار ءِ ترند کننگ نا گرج آ زور شاغا۔ قائد اعظم مزار مینجمنٹ بورڈ انا سیکرٹری و ڈائریکٹر قائد اعظم اکیڈمی صدر مملکت ءِ حوال تس۔ صدر مملکت ءِ اکیڈمی نا انتظامی امور و خاص کر پٹ وپول و اشاعت نا کاریم تا بارواٹ معلومدار کننگا۔ صدر مملکت ءِ پاننگاکہ اکیڈمی نا جوڑ مننگ آن پد آن داتم اسکان انگریزی، اردو و ایلو علاقائی زبان تیٹی 80کتاب شینک کننگا ہرا رعایتی نرخ آتیا فراوان کننگ انگ ءُ۔ صدر مملکت داوخت آ اکیڈمی نا شینک کروک کتاب آتیان ہم ہلک ہرافتا پیسہ غاتے اوتینا جیب آن تس۔
