وزیراعظم عمران خان نا وژن نا رداٹ گلگت بلتستان اٹی سیل وسوات نا مون آ دننگ کن گام گیج کننگ اُن، بنجائی وزیر امور کشمیر و گلگت بلتستان علی امین گنڈاپور

اسلام آباد۔ 17 فروری (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ وزیراعظم عمران خان نا وژن نا رداٹ گلگت بلتستان اٹی سیل وسوات نا مون آ دننگ کن گام گیج کننگ اُن، سیل و سوات آن جہانی کہول آ پاکستان نا دروشم پین گچین مریک، سیل و سوات نا شونداری آن پاکستان نا زرگزران سوگو مریک، گلگت بلتستان سیل وسوات نا بابت دنیا نا گچین انگا علاقہ غاتیٹی اوار ءِ، مستین حکومت آک سیل و سوات نا شونداری آ ہچ ءُ چکار اس کتوس ، بنائی پروجیکٹ 150 اُراتیان بناکننگ انگ ءِ، داپروگرام ءِ بھلو کچ اسے آ تالان کننگک، سیل و سوات نا مون آدننگ کن حکومت بابو سرٹاپ ٹنل جوڑ کننگ نا ڈٹ بندی کننگ ءِ، گلگت بلتستان نا غٹ ہسپتال آتیٹی غت المی آ آسراتی تے فراوان کننگ انگ ءِ۔ چارشنبے نادے آ نیشنل بینک آف پاکستان و گلگت بلتستان حکومت نا نیام اٹ مفاہمت نا یات داشت آ دستخط نا دود نیشنل بینک اسلام آباد اٹی مس۔ معاہدہ نا رداٹ نیشنل بینک’’این بی پی میزبان‘‘ پروگرام نا رداٹ گلگت بلتستان اٹی چنکو وام فراوان کیک۔ وام تے اُراتیٹی سیل و سواتی تا ہنکین کن کمرہ تفنگ کن کاریم اٹ اتنگک، پروگرام نا رداٹ گلگت بلتستان نا غٹ دامان تیٹی الس ءِ وام فراوان کننگک، بنائی وڑاٹ گلگت بلتستان نا غٹ ضلع غاتا 150 اُراتیٹی پائلٹ پروجیکٹ بناکننگ انگ ءِ۔ نیشنل بینک بنائی وڑاٹ دا پروگرام کن 20 کروڑ روپئی جتا کرینے۔ اسہ کمرہ نا تفنگ کن 3 لکھ 75 ہزار روپئی تننگک۔ اِراکمرہ نا تفنگ کن 8 لکھ روپئی تننگک، مسہ کمرہ نا تفنگ کن 13 لکھ 75 ہزار روپئی تننگک، وام تا مدءِ ہفت سال تخنگانے۔ پائلٹ پروجیکٹ نا سرسہبی آن پد داپروگرام ءِ بھلو کچ اسے آ تالان کننگک۔ دا گام آن گلگت بلتستان اٹ سیل و سوات نا مون آ دننگ اٹ کمک رسینگک۔ علی امین گنڈاپور پارے کہ سیل و سواتیک ہندی رسم و رواج آن براہ راست آشنا مریرہ۔ دا گام آن پیک سیزن اٹ سیل و سواتی تیکن ہنکین نا ویل انا مون ءِ توننگ اٹ کمک رسینگک۔