اسلام آباد۔ 17 فروری (اے پی پی) بنجائی وزیر توانائی عمرایوب خان پارینے کہ حکومت توانائی نا بشخ اٹی کاروباراٹ آسانی، شفافیت و بریبر وارخواہی تا فراوانی نا کمک اٹ تیل و گیس انا پیدوار اٹی خودکفالت کن کوشست کننگ اٹی ءِ، 15 پوسکن آ بلاک آتا نیلامی آن مسہ سال اٹی 7 کروڑ ڈالر آن زیات نا زرکاری بریک۔ اوداخیال آتا درشانی ءِ چارشنبے نادے آ داڑے جمہوریہ چیک انا سفیر ٹوماس سمیتنکا تون گپ وتران کرسا کرے۔ بنجائی وزیر توانائی و جمہوریہ چیک انا سفیر پاکستان اٹ توانائی نا بشخ انا بابت سرجم گپ وتران کریر۔ جمہوریہ چیک انا سفیر پاکستان اٹ تیل انا بشخ اٹ زرکاری و ایل این جی نا فراوانی ٹی چیک کمپنی تا کنڈآن است خواہی نا درشانی ءِ کرے۔ عمرایوب خان پارے کہ حکومت پٹرولیم و بجلی نا بشخ انا کارکڑد ءِ گچین کننگ کن پبی پالیسی تیا عمل کننگ ءِ و توانائی نا مارکیٹ ءِ مسابقت نا حامل و گچین کننگ کن سنبرینگوک ءِ۔ ملکی وسیلہ غاتیان فائدہ ہرفنگ و درآمدی ایندھن آ سیبوءِ کم کننگ نا بابت حکومتی حکمت عملی نا بارواٹ اودے معلومدار کرے۔ اوپارے کہ دا حکمت عملی آن باؤماس، دے انا روشنائی و تہوآن 60 درسد، ہائیڈل آن 30و تھرمل ونیوکلر ذریعہ غان 10 درسد بجلی ودی کننگک۔ اوپارے کہ پوسکن آ بلاک آتیٹی تیل و گیس پٹوک آ کمپنیک راجی خذمت آتا بشخ اٹی ہم لکھ آ ڈالر خڑچ کیرہ۔
