اسلام آباد۔ 17 فروری (اے پی پی) اینخو مالی سال اٹی سعودی عرب، متحدہ عرب امارات، برطانیہ و امریکہ نا شمار پاکستان ءِ زر رادہ کروک آ بھلا ملک آتیٹی مریک۔ مالی سال انا بنائی ہفت تُو اٹی جولائی آن جنوری 2020-21اٹی سمندر آن ایپار رہینگوک آ پاکستانی تا کنڈآن 16.47 ارب ڈالر پاکستان آ گدریفنگانے۔ اسٹیٹ بینک آف پاکستان (ایس بی پی) نا حساب وکتاب نا رداٹ برجامالی سال اٹی غٹ آن زیات ترسیلات زر سعودی عرب آن کننگانے۔ سعودی عرب اٹی کاریم کروک آ پاکستانی افرادی قوت مالی سال انا بنائی ہفت تُو اٹی 4.51 ارب ڈالر نا ترسیلات زر کرینو۔ ہنداوڑ پاکستان ءِ ترسیلات زر گدریفوک آ ارٹ میکو بھلا ملک متحدہ عرب امارات ءِ ہراکان جولائی آن جنوری 2020-21اٹی 3.45 ارب ڈالر نا ترسیلات زر کننگانے۔ ایس بی پی نا رداٹ دا بابت برطانیہ مسٹ میکو بھلا ملک ءِ و برطانیہ ٹی رہینگوک آ پاکستانی برادری ہنداوخت اٹی وطن عزیز اٹ 2.18 ارب ڈالر گدریفینو۔ داکان بیدس چندی خلیجی ملک آتیان ملوک آ ترسیلات زر انا کچ 1.89ارب ڈالر اتون چار میکو نمبر آ مسنے۔ یورپی یونین نا ملک آتیٹی رہینگوک پاکستانی برادریک اینخو مالی سال اٹی تینا عزیز و قریب و خاہوت ءِ 1.5 ارب ڈالر گدریفینو۔ ہنداوڑ یورپی یونین نا ملک آتیان پنچ میکو نمبرآ غٹ آن زیات ترسیلات زر انا وصولی مریک۔ حوال نا رداٹ امریکی ہم زیات ترسیلات زر گدریفوک آ ملک آتیٹی اوار ءِ و امریکہ ٹی رہینگوک پاکستانی برادری برجامالی سال اٹی جولائی آن جنوری 2020-21ء ٹی 1.4 ارب ڈالر نا ترسیلات زر کرینے۔
