سینیٹ نا گچین کاری تیٹی عمران خان سرسہب مریک، وزیر داخلہ شیخ رشید احمد نا پریس کانفرنس آن تران

اسلام آباد۔ 16 فروری (اے پی پی) وزیر داخلہ شیخ رشید احمد پارینے کہ نظام ءِ شیف و بڑز کننگ نا است خواہی تخوک آتے شکست مسنے، کنے خوشی مسنے کہ مولانا فضل الرحمان تون اوار اسمبلی تیا لعنت کروک آک اینو ہمواسمبلی تیان وونٹ خواہنگ ءُ، نواز شریف نا پاسپورٹ نا معیاد سے شنبے نا نن دُوانزدہ بجہ غا چٹک، اگہ او درخواست ایتک تو پاکستان آ پدی بننگ کن 72 گھنٹہ ٹی اودے ایمرجنسی ٹریولنگ ڈاکومنٹ (ای ٹی ڈی) جاری کینہ، نواز شریف و مریم نواز ای سی ایل آٹو، ہنداخاطرآن اوفتے پاسپورٹ نا تجدید ءِ کننگ مفک، سینیٹ نا گچین کاری تیٹی ہچ ءُ سرپرائز اس مفک، عمران خان سرسہب مریک، سینیٹ نا گچین کاری تیان پد ملک اٹی سیاسی سکون و گچینی بریک، اپوزیشن روچہ نا شرف ءِ کے و لانگ مارچ روچہ غان پد کے۔ سے شنبے نادے آ وزارت داخلہ پریس کانفرنس آن تران کرسا وزیر داخلہ شیخ رشید پارے کہ ویزہ سیکشن آن 50 آفیسر آتے پدی اتنگ نا فیصلہ کرینن ہرا تینا چارج ءِ ہلیپک اودے فارغ کننگک، دہ سال انا پاسپورٹ نا فیس 4500 روپئی مریک، اِرالکھ بندغ ءِ ای ویزہ تننگک، چار ہفتہ ٹی ویزہ جاری کننگک، ایجنسی تے چار ہفتہ ٹی رپورٹ کلیئر کرسا تروئی مریک۔ اوپارے کہ نواز شریف نا پاسپورٹ نا بھلو شور اسے۔ اونا پاسپورٹ نا معیاد سے شنبے نا نن دُوانزدہ بجہ غا چٹک، 20 اگست 2018ء آن نواز شریف و مریم نواز ای سی ایل آٹی ءُ۔ نیب انا پارت آ اونا پن ءِ ای سی ایل اٹ شاغنگا۔ کابینہ ہم مریم نواز نا پن ءِ ای سی ایل اٹ شاغنگ نا منظوری ءِ تس ہرابندغ نا پن ای سی ایل آ مرے اودے پاسپورٹ جاری کننگ مفک، نواز شریف اگہ وطن آ پدی بننگ خوائے تو 72 گھنٹہ ٹی اودے اونا درخواست آ پاکستان آ بننگ کن ای ٹی ڈی جاری کننگ مریک ولے او پاکستان آ بننگ اٹ است خواہی تخپک و اونا پڑوآک بیرہ سیاسی ءُ، اودے پیشن نا ملک آ ہرا موکل ملاسس اودے او غلط کاریم اٹ ایس، داسہ عدالت ہم اودے وطن آ پدی بننگ نا پارت کرینے۔ وزیر داخلہ پارے کہ نواز شریف ءِ وطن آ پدی اتنگ آن توننگ پننگ ءِ، اوپدی بننگ خواہک تو داسہ درخواست ایتے، اودے سفری دستاویز جاری کینہ۔ وزیر داخلہ پارے کہ کنے خوشی ءِ کہ مولانا فضل الرحمان تون اوار ہرا اسمبلی تیان لعنت کریرہ اینو ہموفک اسمبلی تیان وونٹ خواہسا پیری کننگ ءُ، نظام ءِ شیف و بڑز کننگ نا است خواہی تخوک آتے شکست مسنے۔ اوپارے کہ ہرافک داپاننگ ءُ کہ سینیٹ گچین کاری تیٹی سرپرائز مریک اوجوان چار کہ ہچ ءُ سرپرائز اس مفک، سینیٹ نا گچین کاری تے عمران خان کٹک۔ سپریم کورٹ نا سینیٹ گچین کاری تا بابت اہم فیصلہ ہم بننگ والا ءِ۔ ہرافتا ضمیر کہیک اوفک سودا مریرہ۔ آصف علی زرداری وونٹ آتا ہلنگ اٹ پی ایچ ڈی کرینے ولے اودے مایوسی مریک۔ اوپارے کہ اپوزیشن 26 مارچ آ برانز نا پڑو کرینے ولے کنا اوفتیان خواست ءِ کہ روچہ مبارک نا مقدس آ تُو انا شرف ءِ کیرو برانز ءِ روچہ غان پد کیر ولے اگہ اوفک 26 مارچ آ ہی کننگ خوارہ تو اوفتا کسر اٹ ہچ ءُ اڑاند اس شاغپنہ۔