ہری پور۔ 16 فروری (اے پی پی) بنجائی وزیر توانائی، پٹرولیم و قدرتی وسیلہ عمرایوب خان پارینے کہ تدوک آ حکومت آتا وڈی خوری و غلط پالیسی تا سوب آن ننے مشکل حالیت آتون مون تروک مسنے، داسہ حالیت آک ترندی اٹ گچینی نا کنڈآ ہِننگ ءُ، وزیراعظم عمران خان نا کماشی ٹی ملک ترندی اٹ شون ہلنگ ءِ ہرانا بھرمک لس بندغ اسکان سرمننگ ءُ۔ گچین کاری تیٹی ہراوڑ ہری پور نا الس مچ آ پاکستان اٹی غٹ آن زیات وونٹ ترسا اودے سرسہب کرے انشاء اللہ داکان کیہی زیات ود نئے بیرہ ضلع غان السی محرومی تے چٹفنگ اُن بلکن ضلع ٹی ارب آ روپئی نا بھلو فنڈنگ اسے آن بجلی و گیس انا ہمو میگاوڈٹ آک برجاءُ ہرافتیان بروک آ چینک ہم فائدہ ہرفرہ۔ او تدوک آ دے 6 کروڑ 58 لکھ روپئی نا بھلو فنڈنگ اسے آن تحصیل خانپور نا علاقہ چھوئی و موہڑہ غزن اٹ سوئی گیس انا فراوانی نا ڈٹ انا بنائی دود آن تران کریکہ۔ داوخت آ علاقہ والاک عمرایوب خان و ایم پی اے ارشد ایوب خان ءِ جم وجوش اٹ بخیر کریر وخت اس کہ چیئرمین ارشاد خان، راجہ ذوالفقار، ملک نزاکت، چوہدری حسن دین و ایلو ہندی سرکڑدہ غاک لس جلسہ غان تران کرسا بھلو خڑچ اسے آن عملی گیس انا فراوانی ڈٹ آ بنجائی وزیر عمرایوب خان ءِ شاندار لوز آتیٹی خراج تحسین پیش کریر و اونا بے مٹ السی خذمت آتا ستاءِ کریر۔ دود آن تران کرسا ایم پی اے و چیئرمین ڈیڈک کمیٹی ارشد ایوب خان گیس انا فراوانی ڈٹ انا بناء آ ہندی مخلوق ءِ مبارکبادی تس و پارے کہ گچین کاری تیٹی نن ہرانگ کہ ہنان بجلی نا ویل آن ہراسٹ فریشان خننگاکہ ولے داسہ حالیت آک جتا مسنو۔ ضلع غان بجلی نا ویل آتا چٹفنگ کن ہلہلہ ئی بنداو تیا شانزدہ فیڈر پوروی آن پد پین و دیرپا گچینی کن گریڈ اسٹیشن جوڑ کننگ انگ ءِ وخت اس کہ بنجائی وزیر نا سوب مرمر انگا مشی آ علاقہ غاتیٹی ہم گیس انا فراوانی ڈٹ آک ہم ایسر اسکان سرمننگ ءُ ہرافتا ہچ کس سجفنگ ہم کپک۔
