اسلام آباد۔ 15 فروری (اے پی پی) بنجائی وزیر اقتصادی امور مخدوم خسروبختیار خیبرپختونخوانا حکومت ءِ سیل وسوات، تعلیم و جان جوڑی و پن بجلی تون اوار شونداری ڈٹ آتیا چکار کننگ نا پارت کرینے۔ اوداپارت آتے دوشنبے نادے آ داڑے پیشن نا کمکاری آن پورو مروک آ ڈٹ آتا چاروکی کن جوڑ قومی رابطہ کمیٹی نا دیوان نا کماشی ءِ کرسا جاری کرے۔ دیوان اٹی خیبرپختونخواٹی 3.1ارب ڈالر مالیت نا پیشن نا کمکاری آن برجا 30 ڈٹ آتا سرجمی اٹ جاچ ءِ ہلنگا ہراٹی ٹرانسپورٹ، مواصلات، توانائی، خلقی شونداری،تعلیم و تربیت، دیر و آبپاشی نا نظام نا ڈٹ آک اوار ءُ۔ داڈٹ آتے چین، برطانیہ، سعودی فنڈ، جرمنی، فرانس و جہانی بینک و ایشیائی شونداری بینک کون آ شونداری شریدار آتا کمک اٹ پورو کننگ انگ ءِ۔ بنجائی وزیر دیوان آن تران کرسا پارے کہ پیشن نا کمکاری آن برجاڈٹ آتیا خیبرپختونخواحکومت نا کارکڑد ستاکڑزک۔ اوپارے کہ ڈٹ آتا فائدہ الس اسکان سرکننگ ساڑی حکومت نا وژن ءِ۔ اوپارے کہ خیبرپختونخوا ٹی سیل وسوات، تعلیم و جان جوڑی و پن بجلی نا ڈٹ آتیا چکار کننگ نا گرج ءِ انتئے کہ صوبہ سیل وسوات و دیر انا وسیلہ غاتا کچ تخک۔ اوصوبائی حکومت ءِ شونداری ڈٹ آتیا اولیتی بنداو تیا کاریم ءِ برجاتخنگ نا پارت کرے۔ دیوان اٹی ڈپٹی چیئرمین پلاننگ کمیشن، سیکرٹری اقتصادی امور، ایڈیشنل چیف کمشنر خیبرپختونخوا، پی ایم آفس نا نمائندہ، وزارت خزانہ و تعلقدار صوبائی محکمہ غاتا نمائندہ غاک بشخ ہلکر۔
