اسلام آباد۔ 15 فروری (اے پی پی) وزیر خارجہ مخدوم شاہ محمود قریشی پارینے کہ بلیو اکانومی ءِ علاقائی زرگزرانی شونداری نا وت و مرکز جوڑ کننگ نا گرج ءِ، پاکستان دنیا نا سمندر آتے رکھ کننگ نا اہمیت و پورو ادراک تخک، دا نیک مسخت کن غٹ سنگت ملک آک و مچ آ دنیا ٹی پارٹنر آتون کمک و شریداری عمل کن تیار اُن۔ جہانی بلیو اکانومی 24 ٹریلین امریکی ڈالر آن زیات نا لائخی تخک۔ پاکستان اٹی سمندری سیل و سوات زرگزران اٹی 4 ارب امریکی ڈالر نا بشخ شاغنگ کیک۔ سی پیک و گوادر بندرگاہ نا شونداری گیم چینجر ڈٹ ءُ۔ انتہاپسندہنوتواسوچ انا اثراٹ بھارت نا جنگی گنوکی و جارحانہ پالیسیک جہانی و علاقائی امن و سلامتی کن دمدستی و دائمی گڑتی مون تروک کرینو۔ سویلی ایشیاٹی ہروڑنا فوجی جھیڑہ ڈیہہ ءِ نزور کیک۔ سے شنبے نادے آ کراچی ٹی جہانی میری ٹائم کانفرنس (آئی۔ ایم۔سی۔ 2021) آن مہمان خاص انا حیثیت اٹ تران کرسا وزیر خارجہ پاک بحریہ ءِ مبارکبادی ترسا پارے کہ 2007آن ہراِراسال نا ترتیب آن او’امن‘ نا پن اٹ کثیر الملکی مشق آتا پدریسہ میزبانی نا شرف ءِ دوئی کننگ ءِ۔ اوپارے کہ 2007 ء نا مقابلہ ٹی دا بحری مشق آتیٹی بشخ ہلوک آ ملک آتا بحریہ نا کچ 28 آن ودسا داسال 40 آن زیات اسکان سرمسنے۔ دا مشق آتا سرسہب اڈتننگ جہانی امن و سلامتی نا مون آ دننگ کن پاکستان نا عہد و کوشست آتا درشانی ءِ۔ وزیر خارجہ پارے کہ، خرُن آ دیر تا زرگزران، نسبتا اسہ پوسکن ءُ تصور اسے۔ دا سمندر و بحیرہ غاتا راجی و زرگزرانی شونداری نا کارگر مننگ نا اہمیت آن روشناس کرفک۔ پائیدار بلیواکانومی ساڑی و بروک آ چین تا فائدہ غامبنی و راجی و زرگزرانی بھرم تا دوئی کننگ کن کلیدی اہمیت تخک۔ زرگزرانی چاہندار آتا رداٹ جہانی بلیو اکانومی 24 ٹریلین امریکی ڈالر آن زیات نا لائخی تخک۔ داکان بیدس دانا دا ڈیہہ غا بروک آ دہائی تیٹی بے پناہ اثر شاغنگ کیک۔ وزیر خارجہ پارے کہ ایشیاٹی ودوک آ شونہالی ، قدرتی وسیلہ غاتا بہاؤ آ ودوک آ سیبو آن دے ٹکی نیامی، افریقہ و ایشیائی ٹی پیدواری بندغ آتا صارف آتون رابطہ غاتا استواری، گڑاتا فراوانی و ترسیل نا نظام آن ڈیہہ ٹی فاصلہ پین کم مسنے۔ بحر ہند تین پہ تینی کمک و شریداری عمل نا گچین ءُ موقع اس فراوان کیک ولے جیو اسٹریٹجک مسابقت و گڑاس ملک آتا فوجی غلبہ مننگ نا خواہش دالائخی ءِ بھاز بے وڑ زہمی کرینے۔ خاص وڑاٹ انتہاپسند ہوتواسوچ انا زیراثر بھارت نا جنگی گنوکی و جارحانہ پالیسیک جہانی و علاقائی امن و سلامتی کن دمدستی گڑتی ءُ۔ وزیرخارجہ پارے کہ تسلط پسندانہ عزم اٹی بھارت بحرہند ءِ جوہری خطرہ غاتیان دوچار کرینے۔ وزیر خارجہ پارے کہ اسہ ہزار کلومیٹر کرکی پٹی و وسیع مخصوص زرگزرانی زون انا سوب آن پاکستان اسہ اہم ءُ بحری ریاست اسے۔ پاکستان نا بحری وتواجہی اِرالکھ نود ہزار مربع کلومیٹر آ تالان ءِ ہرامین لینڈ انا کم و ود 36.4 درسد ءِ۔ پاکستان نا بحری علاقہ حیاتیاتی و غیر جانبدار وسیلہ غاتیان پُرءُ۔ پاکستان بحر ہند انا سیکورٹی فریم ورک اٹ اسہ اہم ءُ فریق و حصہ دار ءُ، ہراٹی بحری قزاقی نا چٹفنگ، انسانی و منشیات نا اسمگلنگ نا توننگ کون آ باندات اوار ءُ۔ ننے گمر ءِ کہ پاک بحریہ پاکستان نا کرک و علاقائی سمندر آتیٹی ءِ سلامتی ءِ مون تروک خطرہ غاتون گچین وڑاٹ مون تننگ ءِ تانکہ بحری کسر تے غیر کانودی سرجزو ناپاک عزم تخوک آ زموار آتیان پاک تخنگے۔ وزیر خارجہ پارے کہ امن و سلامتی نا مون آ دننگ نا کوشست آتا بناء آ پاک بحریہ نا مدام ستامسنے۔ جہانی و علاقائی میری ٹائم سیکورٹی نا گیشتر فائدہ غاتیٹی ایلوفتیان بیدس ننا بحرییہ مشترکہ ٹاسک فورس 150 و 151 اٹی فعال وڑاٹ بشخ ہلکونے۔
