لاہور۔ 15 فروری (اے پی پی) گورنر پنجاب چوہدری محمد سرور پارے کہ ننا سنگت ملک چین دنیا ٹی داوخت آ ارٹمیکو بھلا زرگزران نا وڑاٹ مون آ بسنے ہراکہ ستاکڑزوک ءُ ہیت اسے، و زوت دا دنیا نا غٹ آن بھلا زرگزرانی واک جوڑ مننگ والاءِ، نن سی پیک و ون روڈ بیلٹ تون اوار چین نا غٹ میگا ڈٹ آتا غٹ آن بھلا شریدار اُن۔ او دوشنبے نادے آ گورنر ہاؤس لاہور اٹی پاک، چین جوائنٹ چیمبر آف کامرس اینڈ انڈسٹری نا کنڈآن اڈ ہلوک آ بزنس کانفرنس آن بطور مہمان خاص تران کریکہ۔ داوخت آ آل پاکستان چائنیز انٹر پرائزز ایسوسی ایشن نا چیئرپرسن مس سنی ینگ، شینڈونگ ہائی اسپیڈ پاکستان ڈویلپمنٹ کمپنی نا چیف ایگزیکٹو آفیسر و ینگ جی چنگ، چائنیز بزنس مین ایسوسی ایشن، پنجاب مسٹر لوایکیانگ، سن منگ ٹیک نا چیف ایگزیکٹو آفیسر مسٹر کائی ژیانگ، پاک چین، چیمبر نا سینئر نائب صدر داد احمد، نائب صدر خالد رفیق چوہدری و سیکرٹری جنرل صلاح الدین حنیف ئسک ہم تران کریر۔ گورنر پنجاب چوہدری محمد سرور پارے کہ ننکن المی ءِ کہ علاقہ ٹی موثر کڑد انجام تننگ کن نن چین تون اوار غٹ سنگت ملک آتیٹی تینا رسینگ ءِ ممکن کین و زیات آن زیات اسیجائی کاروباری و صںعتی ڈٹ ٹہیفن۔ اوپارے کہ دا چرجوئی ٹی چینی زرکار و پوریاگر پاکستان ءِ خصوصی اہمیت تننگ ءُ و ننا حکومت دا چرجوئی ٹی غٹ تر کانودی مشکل و پالیسی دشواری تے چٹفنگ نا عزم تخک و ہندا کانفرنس نا گورنر ہاؤس اٹ اڈتننگ دا عزم انا پبی درشانی ءِ۔
