حوال، تبسم گل
مٹ و بدل۔ سعادت خان محمد حسنی
پاکستان تحریک انصاف نا حکومت نا جان جوڑی اصلاحات ایجنڈا و قومی ایکشن پلان آ عملدرآمد آن جہانی ردوبند آتا رداٹ جان جوڑی نا سوگو ءُ نظام اس تیار کننگ اٹ کمک رسینگک۔ قومی کہول آ چاروکی و وخت آ گام گیج نا لائخی ءِ ودفنگ کن غٹ اسٹیک ہولڈر آک درکار کاریم نا کچ اٹی ودکی نا کوشست آتیٹی لگوک ءُ۔ دامسخت کن پبلک ہیلتھ لیبارٹریز نیٹ ورک، رسپانس اینڈ لیگل فریم ورک و انٹگریٹڈ ڈیزیز سرویلینس کن اسہ اسٹریٹجک فریم ورک اس تیار کننگانے۔ بشخ اٹی گچین اصلاحات کن بنجائی حکومت اسہ قومی ایکشن پلان اس 2019-23ء ءِ تیار کرینے۔ ہنداوڑ جان جوڑی نا صوبائی محکمہ غاک نیشنل ہیلتھ وژن نا رداٹ جان جوڑی نا بشخ اکن تینا حکمت عملی ءِ ہم گڈیکو دروشم اس تسنو۔ حکومت بنجائی و صوبائی کہول آ ڈیزیز سرویلینس اینڈ رسپانس کن ایمرجنسی آپریشن سینٹرز و کوآرڈینیشن یونٹ ہم جوڑ کرینے۔ ہنداوڑ ’’ون ہیلتھ‘‘ انا نقطہ نظر آ قومی و صوبائی فوکل پوائنٹ ہم جوڑ کننگانے وخت اس کہ ’’جان جوڑی نا بارواٹ قومی ٹاسک فورس‘‘ اس ہم جوڑ کننگانے ہرا جان جوڑی نا نظام نا کارکڑد ءِ گچین کننگ کن اہم اولیت و افعال نا باقاعدگی اٹ جاچ ءِ ہلنگ ءِ۔ وزیراعظم نا خصوصی کمکار نیشنل ہیلتھ سروسز، ریگولیشنز اینڈ کوآرڈینیشن ڈاکٹر فیصل سلطان نا پاننگ ءِ کہ ملک اٹی ہر شاری نا رکھ و جان جوڑ آخبت کن یونیورسل ہیلتھ کوریج ءِ پک کننگ کن پبی گام گیج کننگ انگ ءِ۔
اوپارے کہ جان جوڑی کارڈ آتا رداٹ یونیورسل ہیلتھ کوریج جان جوڑی نا خیالداری نا نظام اٹ انقلاب اس اتیک۔ اودادے مدینہ نا اصول آتا رداٹ آسودہ ئی ریاست نا کنڈآ اسہ بھلو گام اس گوندا۔
پاکستان انسٹیویٹ آف میڈیکل سائنسز(پمز) انا جوائنٹ ایگزیکٹو ڈائریکٹر منہاج السراج پارینے کہ ہسپتال انتظامیہ وزیراعظم عمران خان نا پارت آ جان جوڑی اصلاحاتی ایجنڈا غا عملدرآمد ءِ پک کننگ کن چندی پوسکن ءُ ڈٹ آتا بناءِ کرینے
۔ اوپارے کہ آب اٹ جان جوڑی نا خیالداری نا نظام نا مسخت سرکاری بشخ انا ہسپتال آتیٹی شاری تے گچین طبی آسراتی فراوان کننگ ءِ۔ پمز انا فرنٹ لائن ورکرساڑی آ دین اٹی شاری تے طبی آسراتی فراوان کننگ اٹ پیش پیش مسنو۔ نن داہیت ءِ پک کرین کہ ننا عملہ تعلیم یافتہ و تربیت یافتہ مرے و اوفتے تون غٹ درکار وسیلہ غاک ساڑی مریر۔
فیڈرل گورنمنٹ پولی کلینک نا ڈاکٹر شریف استوری پارینے کہ بنداوی جان جوڑی نا سوگو نظام الس ءِ اوفتا گرج آتا رداٹ آب اٹ طبی آسراتی فراوان کننگ کیک ہرا اوفتا بنداوی حق ءِ ۔ فیڈرل گورنمنٹ پولی کلینک ہسپتال نا انتظامیہ بنجائی دارالحکومت اٹی تینا ڈسپنسرآتیٹی گچین خذمت آتا فراوانی ءِ پک کننگ نا ہروڑ کوشست کننگ ءِ۔ اومستی پارے کہ جان جوڑی نا بشخ اٹی اصلاحات نا رداٹ چندی ڈسپنسر آتے اپ گریڈ کننگانے و بنجائی دارالحکومت نا شاریک دا ڈسپنسرآتیان مفت تشخیص و درمان نا آسراتی تیان بیدس مفت ویکسینیشن خذمت آتیان فائدہ ہرفنگ ءُ۔ نصاف ڈاکٹرز فورم نا چیئرمین ڈاکٹر ڈاکٹر خاور سلطان پاکستانی الس ءِ جان جوڑی نا گچین آسراتی تا فراوانی کن اصلاحات ایجنڈاءِ اسہ اہم ءُ گام اس گوندسا پارینے کہ گچین وسیلہ غاتا دستیابی آن جان جوڑی نا نظام اٹ یقیناگچینی بریک۔ ننا بنداوی مسخت نظام ءِ گچین جوڑ کننگ مرے۔ اواومیت ظاہر کرے کہ حکومت ملک انا الس خاص کر غریب و ضرورت مند بندغ آتا گرج آتے پورو کننگ کن جان جوڑی نا خیالداری نا نظام اٹ مثبت بدلی اتنگ نا بابت تینا وعدہ غاتے پورو کیک۔
