لاہور۔12فروری (اے پی پی): مزن وزیر عمران خان ءَ گوشت کہ ملکی دیمروئی ءِ واستہ دراج بریں منصوبگ آنی ضلورت انت۔ اربن فاریسٹ ءِ اے منصوبگ سک باز ارزشتی انت، لاہور یک سرسبزیں شہر ءِ بوتگ ، ایشی ایٹماسپیئر ءِ ھوالگ ءَ اچ رنگیں گامگیج ءُ دلگوشی کنگ نہ بوتگ، نوں ما ایٹماسپئر ءِ گر ءُ دار کنگ ءِ واستہ گرین بیلٹس آنی تہءَ گیشی کنگ ءِ واستہ گامگیج کنگ ءَ آں، گوستگیں زمانگ ءَلاہور شہر ءِ 70 درسد گرین بیلٹ ھلاس کنگ بوتگ، مُج ءُ سموگ ءِ سبب ءَ ایٹماسپیئر ءُ بنی آدمی جان سلامتی ءِ سر ءَ رند پد نکش بوھگ ءَ انت۔ اے ھیالانی درشانی آئی ءَ آدینگ ءِ روچ ءَ جیلانی پارک ءَ اربن فاریسٹ ءِ منصوبگ ءِ بنگیجی مراگش ءَ گوں گشتانک دیان ءَ کت۔ ایشی ءَ چہ پیسر مزن وزیر عمران کان ءَ میاواکی ءِ درچکے نہال ءِ کشت ءُ اے منصوبگ ءِ بنگیج کت۔ اے منصوبگ ءِ چیر دستی ءَ 50 دمگ آں جنگل جوڑ کنگ بیت۔ اے موہ ءِ سر ءَ مزن وزیر ءَ را منصوبگ ءِ ھوالگ ءَ سرجمیں بریفنگ دیگ بوت۔ مزن وزیر عمران خان ءَ گوشت کہ بدبھتی ءَ چہ لاہور ءَ سموگ ءَ ھوار ایٹماسپیئر ءِ جاور سک باز ھراب انت، شہری ھاسیں رنگ ءَ زھگ ءُ پیریں مردم آنی جان سلامتی ءِ واستہ سک باز تاوان ایگ انت، لاہور ءَ ایٹماسپیئر ءَ را گر ءُ داسر کنگ ءِ واستہ کشت ءُ کشار ءِ تہ ءَ گیشی کنگ ءَ آں۔ آئی ءَ گوشت کہ ملک ءِ 50 دمگ آنی تہ ءَ نوکیں جنگل آنی گیشی ءَ چہ سیٹلائٹ ءِ وسیلگ ءَ مانیٹر کنگ بہ بیت۔ الس آناں ھم جنگل ءِ بابت ءَ سرپدی ءِ واستہ گامگیج چست کنگ لوٹ ایت، سرجمیں ملک ءَ کشت ءُ کشار ءِ موسم بندات بوھگ ءَ انت، دریائے سندھ ءِ راستیں نیمگ ءَ زیتون ءِ درچک کشگ بوھگ ءَ انت، آئی ءَ گوشت کہ ملکی دیمروئی ءِ واستہ دراج بُریں منصوبگ بندی کنگ ءِ ضلورت انت۔
