اسلام آباد۔ 11 فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ وخت بسنے کہ جہانی برادری بھارتی ظلم انا نوٹس ءِ ہلے و کشمیری تا حق ءِ خلنگ نا ناپاک عزم آن نجات ترفے، وزیراعظم عمران خان نا جیرت مندانہ سرکڑدہ ئی ٹی پاکستان بھارتی ظلم، بربریت، مقبوضہ کشمیر نا آئینی حیثیت ءِ بدل، مریس لاک ڈاؤن و است ہسون سلوک ءِ جہانی راہشون، جہانی ادارہ، اقوام متحدہ و او آئی سی تون اوار جہانی فورم تیا بے نقاب کرینے۔ پاکستان تینا کشمیری ایلم تا حق خودارادیت جہد اٹ اوفتے تون سلوک ءِ، ہرتدوک آ دے کودک، کشمیری تیکن ننا مخ تفی ءِ پین سوگوی رسینگک۔ او پنچ شنبے نادے آ دفترخارجہ ٹی ’’یوم یکجہتی کشمیر عکسی نمائش‘‘ نا دود آن تران کریکہ۔ صدر آزاد کشمیر سردار مسعود خان، وزیر خارجہ شاہ محمود قریشی، درملکی سفارتکارآک بھلو کچ اسے ٹی دود اٹی بشخ ہلکر۔ بنجائی وزیر حوالکاری و شینکاری سینیٹر شبلی فراز پارے کہ غیر کانودی بھارتی مقبوضہ کشمیر اٹی زند انا ایلو پلو آتون اوار اوار غٹ دودوربیدہ ئی و قدرتی زیبائی ءِ تالان کننگ کن وزارت خارجہ نا کنڈآن عکسی نمائش نا اڈتننگ جوان ءُ گام اسے۔ اوپارے کہ تدوک آ منہ دے آن پاکستان و مچ آ دنیا ٹی رہینگوک آ پاکستانی و کشمیری و جہانی برادری کشمیری تتون پورو یکجہتی نا درشانی ءِ کرینو۔ دا اسہ وخت اکن آخا بلکن مدام برجاسلوک آ یکجہتی نا درشانی ءِ۔ اوپارے کہ حکومت و پاکستان نا الس تدوک آ ہفت دہائی آن کشمیری ایلم تا مخ تفی ءِ کننگ ءُ و ہراتم اسکان کشمیریک تینا حق خودارادیت نا انمول حق اکن جہد کننگ اٹ سرسہب مفسہ دا مخ تفی برجاسلک۔ اوپارے کہ وزیراعظم عمران خان نا جیرت مندانہ سرکڑدہ ئی ٹی پاکستان 5 اگست 2019نا ہندوستان نا غیر کانودی گام گیج آتے مسترد کرینے و جہانی کہول آ داویل ءِ امن و سلامتی، انسان دوست و کانودی پلو آتے تالان کرینے۔ اوپارے کہ پاکستان نا کوشست رنگ اتنگ ءِ، ہر جہانی فورم آ کشمیر نا ویل آ ہیت مننگ ءِ، اقوام متحدہ نا سلامتی کونسل 5 اگست 2019آن 3 وار کشمیر نا ویل آہیت کرینے۔ اقوام متحدہ نا سیکرٹری جنرل کیہی وار پک کرینے کہ جموں و کشمیر نا بارواٹی اقوام متحدہ نا موقف اقوام متحدہ نا منشور و قابل اطلاق سلامتی کونسل نا قرارداد آتا رداٹ ءِ۔ اوپارے کہ اولیکو وار دُن مسنے کہ جہانی راہشون، جہانی انسانی حق انا تنظیمک و جہانی میڈیا بھارتی فوج انا مقبوضہ کشمیر اٹی لاک ڈاؤن نا مذمت اٹی یک توار ءُ۔ اوپارے کہ پاکستان وار وار آ امن نا است خواہی نا درشانی ءِ کرے ولے بدبختی اٹ بھارت آن غیر کانودی وڑاٹ مقبوضہ جموں و کشمیر 5 اگست 2019 آ تینا غیرکانودی و اسہ کنڈی گام گیج آن چاگڑد ءِ خراب کرینے۔
