اسلام آباد۔ 11 فروری (اے پی پی) وزیر خارجہ مخدوم شاہ محمود قریشی پارے کہ ننے سرکاری ملازم آتا اہمیت، گرج و ویل آتا جوان سماءِ۔ پنچ شنبے نادے آ تینا اسہ بیان اسے ٹی وزیر خارجہ پارے کہ دھرنا ہمووخت آ تننگک ہراتم نما ہیت ءِ بِننگپ، ننے سماءِ کہ کبینی ٹی ودکی نا سوب آن سرکاری ملازم آک ہم تکلیف نا گواچی ءُ، ننے داڑکن کسر اس کشوئی ءِ داڑکن نن گڑاس وزیر آتیا تالان کمیٹی اس جوڑ کرینن۔ اوسرکاری ملازم آتیان خواست کرے کہ اوفتا برانز ریکارڈ مسنے، داسہ او تینا نمائندہ اس پن کیر و ہیت وگپ نا کمک اٹ معاملہ غاتا ایسر اس کشر۔ وزیر خارجہ پارے کہ اپوزیشن نا کوشست مریک کہ او ہر ویل ءِ تہوایتے و باندات آتے ایسر کننگ نا جاگہ غا اوفتے ٹی پین بگاڑ ودی کے، کنا سلاہ ٹی سرکاری ملازم آتا تینا تنظیمک ءُ او تینا موقف ءِ گچین وڑاٹ پیش کننگ نا لائخی تخرہ ہنداخاطرآن اوفتے اپوزیشن نا سیبو ءِ ہلنگ نا گرج اف۔ اوپارے کہ وزارت خزانہ ءِ وسیلہ غاتا کنڈآ ہم ہروئی ءِ ہرانا بھاریم آخر کار الس آ بریک، ننے دا غٹ حالیت آتے مون آ تخسا باندات آتے ایسر کروئی ءِ۔
