اسلام آباد۔ 11 فروری (اے پی پی) سرکاری ملازم آتا تنخواہ تیٹی ودکی کن جوڑ کروک آ مذاکراتی کمیٹی پڑو کرینے کہ گریڈ اسٹ آن 19 اسکان نا بنجائی ملازم آتے 25 درسد ایڈہاک ریلیف تننگک ہرا جون اٹی پیش کروک آ بجٹ اٹ ضم کننگک، غٹ باندات آک جوان وڑاٹ مسنو۔ برانز اینو ہی چٹک، دزگیر کروک آ غٹ ملازم آتے یلہ کرسا ایف آئی آر تے پدی ہلنگک۔ داخیال آتا درشانی ءِ پنچ شنبے نادے آ داڑے بنجائی ملازم آتون مذاکرات کروک آ حکومتی کمیٹی ٹی اوار بنجائی وزیر آک سرکاری ملازم آتا نمائندہ غاتون اوار اسیجاپریس کانفرنس کرسا کریر۔ حکومتی کمیٹی ٹی بنجائی وزیر دفاع پرویز خٹک، وزیر داخلہ شیخ رشید احمد و وزیر مملکت پارلیمانی امور علی محمد خان اوار ئسر۔ وزیر داخلہ شیخ رشید احمد پارے کہ برانز کروک آ ملازم آتون معاملہ غاک طے مسنو۔ سرکاری ملازم آتا ہڑتال چٹک و دا تینا اُراتیا پدی کارہ۔ وزیر داخلہ پارے کہ دا فیصلہ غاتا منظوری ءِ وزیراعظم آن تینٹ ہنسا ہلکونن۔ گریڈ 20، 21 و 22 نا تنخواہ تا فیصلہ ءِ بجٹ اٹ کننگک، پولیس وسیکورٹی کارندہ غاتا تنخواہ تیٹی ہم ودکی بجٹ اٹی کننگک۔ اوغٹ دزگیر ملازم آتے یلہ کننگ نا پڑو کرسا پارے کہ ایف آئی آر تے پدی ہلنگک۔ اوپارے کہ وزیر خزانہ ڈاکٹر عبدالحفیظ شیخ و سیکرٹری خزانہ دا فیصلہ غاتیا عملدرآمد کرفرہ۔ وزیر دفاع پرویز خٹک پارے کہ کم و ود اسہ سال آن بنجائی ملازم آتا تنخواہ تا ویل ئس۔ ننا فیصلہ ءِ کہ 25 درسد ایڈہاک ریلیف ایتنہ۔ صوبائی ملازم آتا ویل ءِ ایسر کننگ نا ہم پارت کرینن۔ اپ گریڈیشن نا فیصلہ ہم کرینن ہراڑآ جون آن پد عمل مریک۔ اوپارے کہ ایڈہاک ریلیف جون اٹ بروک آ بجٹ اٹ ضم کننگک، خیبرپختونخوا نا ملازم آتیکن ٹائم اسکیل منظور مسنے ایلو صوبہ غاک ہم عمل کیرہ، وڑوڈول انا رداٹ ترقیک مریرہ و کاریم کروک آ بندغ آتے مون آ اتنگک۔ اوپارے کہ پنجاب و خیبرپختونخوا نا ہیلتھ ورکرآتا ویل ءِ ہم ایسر کینہ، صوبہ غاتے ہم تنخواہ تا ویل انا ایسری کن سلاہ تننگک۔ اوپارے کہ برانز کروک آ غٹ فیڈریشن تا منت واری ءِ ہرفیوہ۔ تدوک آ دے انتس کہ مس اوڑآ معذرت خواہ اُن، نن پاریسن کہ پبی کوشست کننگ اُن کہ نما ویل ایسر مرے۔ وزیر مملکت پارلیمانی امور علی محمد خان پارے کہ بنجائی ملازم آتا ویل آتا ایسری کن وزیراعظم ذاتی دلچسپی ہلک و ملازم آک صبر آن کاریم ہلکر۔ اوپارے کہ ملازم آتا پرامن برانز نا ستاءِ کینہ۔ اسہ سوج اسے نا ورندی ٹی وزیر داخلہ شیخ رشید احمد پارے کہ تحریک لبیک تون گپ وتران مننگ ءِ زوت خوشی نا خبر اس بِننہ۔
