اسلام آباد۔ 11 فروری (اے پی پی) صدر مملکت ڈاکٹر عارف علوی خصوصی بندغ آتے آسراتی تننگ کن الیکٹرک وہیل چیئر، عزوہ و تعلقدار گڑاتیا کسٹم ڈیوٹی آن استثنیٰ نا گرج آ زور شاغسا پارینے کہ افراد باہم معذوری ءِ کسبکار و اوفتا کوٹہ غا عملدرآمد ءِ پک کروئی مریک۔ داخیال آتا درشانی ءِ او پنچ شنبے نادے آ ایوان صدر اٹی خصوصی بندغ آتا آسراتی نا بابت دیوان نا کماشی ءِ کرسا کرے۔ دیوان اٹی سیکرٹری وزارت انسانی حق اکرام اللہ خان وزارت نا کنڈآن دا رداٹ کروک آ گام گیج آتیا حوال تس۔ صدر مملکت ڈاکٹر عارف علوی پارے کہ افراد باہم معذوری ءِ کسبکار و اوفتا کوٹہ غا عملدرآمد ءِ پک کروئی مریک۔ خصوصی بندغ آتا روزگار و جان جوڑی نا گرج آتے اولیتی بنداو تیا ایسرکروئی مریک۔ اوپارے کہ خصوصی بندغ آتے معاشرتی و زرگزرانی چیلنج مون تروک ءِ، خصوصی بندغ آتے واکدار کننگ حکومت و راج انا اجتماعی زمواری ءِ۔ اوپارے کہ وزارت انسانی حق ہر بشخ اٹ معذوری نا کہول انا جاچ ءِ ہلنگ کن چاہندار آتا کمیٹی اس جوڑ کے۔ صدر مملکت خصوصی بندغ آتا تعلیم کن استاد آتے تربیت تننگ نا گرج آ زور شاغا۔
