اسلام آباد۔ 11 فروری (اے پی پی) وزیراعظم عمران خان پارینے کہ انتظامیہ المی آ گڑاتا مقرر کروک نرخ آتیا عملدرآمد ءِ پک کیر، آفیسر آک غریب آتا تکلیف آتا احساس ءِ کیر۔ پنچ شنبے نادے آ وزیراعظم عمران خان نا کماشی ٹی بڑزکو کہولی دیوان اس مس ہراٹی بنجائی وصوبائی وزیر آک و تعلقدار بنجائی و صوبائی سیکرٹریک ہم بشخ ہلکر۔ ویڈیو لنک انا کمک اٹ دیوان اٹی صوبہ غاتا چیف سیکرٹریک ہم ساڑی ئسر۔ وزیراعظم ءِ سینئر صوبائی وزیر فوڈ پنجاب نا کنڈآن پاننگاکہ اونا پارت نا رداٹ پنجاب حکومت فلور مل آتے 07 جولائی 2020ء آن خولم فراوان کننگ ءِ۔ وزیراعظم ءِ پاننگاکہ داتم اسکان 36 لکھ ٹن خولم 50 ارب روپئی سبسڈی اتون جاری کننگانے۔ دیوان ءِ پاننگاکہ پنجاب اٹی خولم آ 510 روپئی فی من نا حساب اٹ ودکی بھاریم ءِ حکومت برداشت کننگ ءِ و دا ودکی بھاریمءِ صارف آتیا تخپننگ انگ ءِ۔ وزیراعظم وزیر خزانہ ءِ پارت کرے کہ او ساڑی آ ہلنگ نا نظام نا جاچ ءِ ہلے و محکمہ فوڈ انا کمک اٹ مروک آ ودکی خڑچ آتے کم کننگ نا مسخت کن اسہ گچین ءُ کاروباری ماڈل اس تجویز کے۔ چیف سیکرٹری پنجاب وخیبرپختونخواوزیراعظم ءِ میوہ و سوزی منڈی تا جوڑ کننگ کن صوبہ غاتا ساڑی ریگولیٹری میکانزم نا بارواٹی معلومدار کریر۔ چیف سیکرٹری خیبرپختونخوا پارے کہ وزیراعظم نا پارت آن پد صوبہ ٹی 65 بزغر مارکیٹ جوڑ کننگانے، مچ آ صوبہ ٹی تحصیل نا کہول آ 13 مارکیٹ جوڑ کننگا ہرافتا لیسن نیلام مس۔ داکان بیدس ایلو ہند آتیا 23 مارکیٹ جوڑ کننگا۔ وزیراعظم ءِ پنجاب کشاری مارکیٹنگ ریگولیٹری اتھارٹی ایکٹ 2018نا ساڑی دفعات و اوکان پد مروک آ ترمیم تا بارواٹی پاننگا۔ وزیراعظم نجی فارم مارکیٹ آتا جوڑ کننگ کن سخت کسوٹی ءِ مسترد کرسا پارت کرے کہ نجی بشخ ءِ آسان، سادہ و اڑزآن آسراتی فراوان کننگ کن ساڑی میکنزم نا جاچ ءِ ہلنگے۔ وزیراعظم پارت کرے کہ کانود اٹی مناسب ترمیم کننگے تانکہ منظوری آن جاگہ غا تکمیل مرے۔ ضابطہ نا اختیارآتے ڈویژنل و ضلعی کہول آ گدریفنگے و نیلامی ٹی شفافیت ءِ پک کننگ کن مارکیٹ اٹ مروک آ غٹ سرجزآتے ویڈیوریکارڈ کننگے۔ وزیراعظم چیف سیکرٹری تے داہم پارت کرے کہ انتظامیہ صارف آتے سرکاری وڑاٹ طے مروک نہاد آتیا گڑاتا فراوانی ءِ پک کیر۔ اوپارت کرے کہ ڈیوالئی نا حالیت اٹ تعلقدار عہدیدار آتا برخلاف سخت کارروائی کننگے۔ وزیراعظم پارے کہ سرکاری آفیسر آک تینا خود آن نہاد آتیٹی ودکی و انتظامی بے سہبی تا سوب آن الس ءِ پیش بروک آ ڈکھ و تکلیف آتا احساس ءِ کیر۔
