مٹ و بدل، سعادت خان محمد حسنی
احساس پروگرام نا رداٹ مچ آ ملک اٹی آسراتی تیان شُپ ہنکین تا جوڑ کننگ راج انا نزور تپہ غاتیکن اسہ انقلابی ءُ گام اسے۔ دا ہنکینک اُراتیان مُر ہموبندغ آتا ہنکین نا گرج ءِ پورو کننگ ءُ ہرافک ہنکین نا خڑچ آتے برداشت کننگ نا وس تخپسہ۔ وزیراعظم عمران خان نا حکومت راج انا نزور تپہ غاتا گرج آتے پورو کننگ کن ہر کہول آ گام گیج کرے، ہنکین تا جوڑ کننگ ہم ہندا چرجوئی نا اسہ کڑی اسے۔ ہمو بندغ آک ہرافک ترند انگا باسنی و یخ اٹی بے چھت آن زند ءِ تیر کننگ آ بیوس ئسر، حکومت اوفتے ہنکین تا حالیت اٹ اسہ ہندن ءُ آسراتی اس تس ہراڑے دابندغ آتیکن اِرا وخت نا کُن و خور تون اوار ہنکین نا آسراتی دُوبرے۔
ستمبر 2020ء آن پد آن احساس ہنکین تا کمک اٹ پنچ لکھ 6 ہزار 521 بندغ دا آسراتی آن فائدہ ہرفینو ہرافتیان 57ہزار 338 بندغ ءِ ہنکین و 4 لکھ 49 ہزار 183 بندغ ءِ کُن و خور نا آسراتی فراوان کننگا۔ فروری 2021ء ٹی داتم اسکان 51 ہزار 860 بندغ دا ہنکین تیان فائدہ ہرفیرہرافتیان 4 ہزار 718 بندغ ءِ ہنکین و 47 ہزار 142 بندغ ءِ کُن و خور فراوان کننگا۔ بنجائی دارالحکومت نا علاقہ بہارہ کہو، منڈی موڑ، پشاور موڑ، ترلائی و ترنول اٹی جوڑ پنچ ہنکین تیان داتم اسکان چار لکھ 82 ہزار 30 بندغ فائدہ ہرفینو، ہرافتیان 56 ہزار 673 بندغ ءِ ہنکین و 4 لکھ 25 ہزار 357بندغ ءِ کُن و خور فراوان کننگا۔ حکومت داسہ دا ڈٹ ءِ سندھ، بلوچستان و خیبرپختونخوااسکان ودفنگ اٹ لگوک ءِ۔
جہلم آن تعلق تخوک آ عامر ندیم وزیراعظم عمران خان نا دا گام انا ستاءِ کرسا پارے کہ دا ڈٹ آن نیزگار شاری تے گچین آسراتی دُوبسنے۔ داوڑنا گام گیج بایدے بھاز مہالو کننگوسس۔ اوہنکین تیٹی تروک آآسراتی تیا است جمی نا درشانی ءِ کرسا پارے کہ ہنکین تیٹی مخلوق نا درج کننگ نا باقاعدہ وڑوڈول اسے۔ پاکستان بیت المال داڑے سفائی نا گچین بست وبند کرینے۔ عملہ ہنکین تیٹی رہینگوک آتون پبی کمک کیک۔ اومستی پارے کہ دا آسراتی نا فراوانی آن پد ننا فرض ہم مریک کہ نن عملہ تون کمک کین و کورونا ایس او پی تیا عمل کین۔
ضلع صوابی آن محمود حسن ہنکین تیٹی تروک آ آسراتی تے گچین گوندسا پارے کہ دا نیزگار و خواری کش آتیکن گچین ءُ آسراتی اسے۔ داکان مست نیزگار مخلوق ءِ ترند انگا یخ اٹی دوکان تیان پیشن و فٹ پاتھ آتیا خاچوئی تماکہ۔ داسہ ہنکین تیٹی اوفتے آرام دہ کٹ و لیپ ملنگ ءِ ہرا نیزگار آتیکن بھاز بھلو آسراتی اسے۔
جی نائن ہنکین نا شفٹ انچارج محمد عبید اللہ عباسی پارے کہ اونا بست وبند اٹی ہنکین اٹی 100 کٹ ءُ ہراڑے رہینگوک آ بندغ آتے ہنکین و کُن و خور تون طبی آسراتی ہم فراوان کننگک۔ اوپارے کہ دا ڈٹ پاکستان بیت المال نا چاروکی ٹی کاریم کننگ ءِ۔ اوپارے کہ ہنکین تیٹی اسہ باقاعدہ وڑوڈول اسے آ عمل کننگک ہرانا رداٹ ہنکین اٹی رہینگ انگ نا خواہندار بندغ نا سی این آئی سی ءِ ہلنگک۔ اوڑآن ہلوک آ معلومداری تا رداٹ کارڈ جاری کننگک ہراڑآ کٹ انا نمبر درج مریک ۔ اوپارے کہ ہنکین اٹی رہینگوک آتے آسراتی تا فراوانی ءِ پک کننگک۔ عبیداللہ عباسی مستی پارے کہ ہنکین اٹی رہینگوک آتیان ناجوڑ بندغ آتیکن تینا ڈاکٹر نا پن آن باقاعدہ طبی آسراتی ساڑی ءِ۔ ہنکین اٹی ہر ناجوڑ بندغ ءِ ہُننگ کن آن کال ڈاکٹر دستیاب مریک۔
اسہ پین شفٹ انچارج میمونہ قریشی پارے کہ ہنکین اٹی بروک آ بندغ آتا اول معائنہ ءِ کننگک و اوفتے سینیٹائزر و ماسک انا آسراتی فراوان کننگک۔ ہنکین نا فراوانی ٹی بزرگ و ناجوڑ بندغ آتے اولیت تننگک و اوفتا آسراتی کن ہندن ءُ کٹ الاٹ کننگک ہراکان اوفتے واش روم اسکان دننگ اٹ مشکل مف۔
