کلرسیداں(راولپنڈی)۔ 10 فروری (اے پی پی) وزیراعظم عمران خان پارینے کہ حقدار و نزور تپہ غاتے مالی کمک نا فراوانی حکومت نا زمواری ءِ ، دااحسان اس اف، حقدار بندغ آتے اوفتا نت تیا سلفنگ و چنکا کاروبار کن کمک کینہ۔ حقدار آتسکان اوفتا حق ءِ سرکننگ کن شفاف وڑوڈول اختیار کننگا، غیر حقدار بندغ آتے احساس پروگرام نا لڑآن کشنگانے، مفت درمان کن نزور تپہ ءِ ہیلتھ کارڈ انا آسراتی ہم تننگ اُن۔ پوسکن آ پاکستان ہاؤسنگ اسکیم آ کاریم برجاءِ، این جی او تتون اواری اٹ حقدار آتے چھت تننگک۔ احساس کفالت پروگرام نا ارٹ میکو ریسہ ٹی 70 لکھ حقدار خاہوت آتیٹی ساف وڑاٹ زر بشخنگک۔ اوداخیال آتا درشانی ءِ چارشنبے نادے آ کلرسیداں ٹی احساس کفالت پروگرام نا ارٹ میکو ریسہ نا بناء نا وخت آ حقدار آتون گپ وتران کرسا کرے۔ داوخت آ وزیراعظم نا خصوصی کمکار تخفیف نیزگاری و راجی رکھ ڈاکٹر ثانیہ نشتر ہم ساڑی ئسک۔ وزیراعظم عمران خان پارے کہ احساس پروگرام نا رداٹ مالی کمکاری نا راج انا دا نزور تپہ و حقدار آتے فراوانی حکومت نا احسان آخا بلکن فرض ءِ۔ ہرا مشکل آتا گواچی ءُ حکومت حقدار خاہوت آتے ہیلتھ کارڈ ہم فراوان کیک ہرانا رداٹ او ہر ہسپتال آن ہفت ءُ نیم لکھ روپئی اسکان درمان ءِ کرفنگ کیرہ۔ وزیراعظم پارے کہ احساس کفالت پروگرام نا رداٹ حقدار آتے مالی کمک نا فراوانی برجاسلک۔ داکان بیدس اخوت این جی او تون راج انا نزور تپہ غاتیکن اُراہم جوڑ کننگ انگ ءِ، پوسکن آ پاکستان ہاؤسنگ اسکیم آ ہم کاریم برجاءِ و دا ہمومزور آتیکن ءُ ہرافک اُراہلنگ نا وس تخپسہ۔ اوپارے کہ حقدار آتے تینا چھت تننگک و ہندن ءُ نظام اس اتینہ کہ او کِرا تننگ نا جاگہ غا قسط آتیٹی تینا اُرا ءِ ہلنگ کیرہ۔ دا چرجوئی ٹی اخوت تنظیم ءِ مسہ نیم ارب روپئی جاری کننگانے، کل دہ ارب روپئی ادا کننگک تانکہ حقدار بندغ آک تینا اُراءِ جوڑ کننگ کن وام ہلنگ کیر۔ وزیراعظم پارے کہ حقدار بندغ آتے تینا نت تیا سلفنگ کن چنکاکاروبار کن آسراتی ایتنہ۔ دا چرجوئی ٹی سلائی مشین و چنکا دوکان تا آسراتی تننگک تانکہ ہرافتا گزربسر مشکل اٹ مریک اوتینا کاروبار ءِ برجاتخنگ کیر۔ وزیراعظم پارے کہ حقدار آتے نغد 12 ہزار روپئی نا مالی کمک فراوان کننگ برجاءِ و کوشست ءِ کہ زر حقدار بندغ آتے ہی رسینگے۔ 8 لکھ 20 ہزار سرکاری ملازم آتے احساس نا لڑآن کشنگانے، داکان بیدس 30 ہزار پین غیر حقدار بندغ آتے ہم لڑآن کشنگانے۔ وزیراعظم پارے کہ لبنان اٹی مظاہرہ غاتا چرجوئی برجاءِ و مچی کروک آتا دا موقف ءِ کہ ہموڑے کورونا دین اٹی سیاسی بنداو تیا غیر منصفانہ وڑاٹ مالی امداد بشخنگانے وخت اس کہ پاکستان اٹ احساس پروگرام نا رداٹ منصفانہ وڑاٹ مالی امداد نا بشخنگ ءِ پک کننگا و سیاسی بنداو آ بشخ و پانٹ متو، ہنداسوب ءِ کہ کس اس داڑآ ہور ہرفتو۔ غٹ آن زیات کمکاری سندھ اٹی کننگانے انتئے کہ میرٹ آ زر بشخنگا۔ ہراڑے نیزگاری و گرج زیات ئس ہموڑے زیات زر بشخنگانے۔ وزیراعظم پارے کہ احساس کفالت پروگرام نا ارٹ میکو ریسہ اینو آن بناکننگ ءِ و 70 لکھ حقدار خاہوت آتے ٹی ساف وڑاٹ زر بشخنگک۔
