اسلام آباد۔ 10 فروری (اے پی پی) وزیر دفاع پرویز خٹک، وزیر داخلہ شیخ رشید احمد و وزیر مملکت پارلیمانی امور علی محمد خان ئسک پارینو کہ پے اینڈ پنشن کمیشن نا فیصلہ اسکان تنخواہ تیٹی اسپیشل الاؤنس نا دروشم اٹ ریلیف تننگ کن تیار اُن، سرکاری ملازم آتون ہرا باندات آتے طے کرینن، اوڑآ سلوک اُن۔ برانز ملازم آتا حق ءِ، سرکاری ملازم آتا ویل آتے سیاسی پارٹیک تینا مسخت آتیکن کاریم اٹ اتنگ خوارہ، پمز ہسپتال نا ملازم آتا کنڈآن ہڑتال ءِ چٹفنگ آ اوفتا منت وار اُن، صوبہ غاتیان اوفتا ملازم آتا راجی آسراتی کن گام گیج کننگ نا درخواست کینہ۔ داخیال آتا درشانی ءِ اوفک چارشنبے نادے آ داڑے اسیجائی پریس کانفرنس آن تران کرسا کریر۔ پریس کانفرنس آن تران کرسا وزیر دفاع پرویز خٹک پارےکہ نن چار تُو آن بنجائی ملازم آتون رابطہ ٹی ئسن، ملازم آتا یونین آتون کیہی دیوان مس، دا معاملہ ءِ کابینہ ٹی ہرفین، کابینہ ملازم آتا ویل آتا ایسری کن مسہ باسکی کمیٹی اس ٹہیفین و کمیٹی ہم اوفتے تون کیہی دیوان اڈ تسن، اوپارے کہ ملازم آتون گڑاس باندات بے مسنو ولے تنخواہ تیٹی پرخ انا بابت معاملہ ایسر متنے۔ دا بابت وزیر خزانہ تون ہم گپ وتران مس۔ پے اینڈ پنشن کمیشن نا فیصلہ اسکان ملازم آتے اسپیشل الاؤنس نا دروشم اٹ ودکی کننگ کن تیار اُن، پے اینڈ پنشن کمیشن نا فیصلہ بریک و جون اٹی بجٹ اسکان دا معاملہ تینٹ ایسر مریک۔ نن ایوریج 60 درسد پرخ انا 40 درسد تننگ کن تیار اُن ولے ملازم ڈیمانڈ زیات کرینو۔ اوپارے کہ بیسک پے آ ملازم آک 40 درسد ودکی نا ڈیمانڈ کرینو، داڑآ ہیت سلیسونے، ملازم آتا زیات تر ویل آ نن امنا کرینن،درواسکان ملازم آتا گریڈ اسٹ آن 16 اسکان نا تنخواہ تیٹی ودکی نا خواست ئس، داسہ اناگت گریڈ 22 اسکان نا ملازم آتا تنخواہ تیٹی ودکی نا خواست ءِ کرینو۔
