اسلام آباد۔ 10فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ پی ڈی ایم نا سیاسی خودغرضی نا اسہ پین درور اس دادے کہ او ہر برانز اٹ تینا بیرک ءِ ہرفسا رسینگک، اینو حکومت ہرامشکل و ویل آتا گواچی ءِ اونا زموار مسلم لیگ (ن) و پیپلزپارٹی ءُ، دا ہڑتوم آ پارٹیک ملکی وسیلہ غاتے بے دردی اٹ پُلار و تینکن میرات جوڑ کرسا کریر ، ملکی فائدہ غاتا بیانہ نا مون آ دننگ کن ایلو بشخ آتیانبار میڈیا نا ہم اہم ءُ کڑد اسے، حکومت کبینی نا مون ءِ توننگ کن ہلہلہ ئی گام گیج کننگ ءِ۔ او چارشنبے نادے آ نیشنل پریس کلب اٹی دیر بالا پریس کلب نا پوسکن گچین مروک آ عہدیدار آتا سوغندی دود آن تران کریکہ۔ بنجائی وزیر حوالکاری سینیٹر شبلی فراز پارے کہ دیر بالا پریس کلب نا عہدیدار آتا منت واری ءِ ہرفیوہ کہ اوفک اسلام آباد آ بسنو۔ دیر بالا پریس کلب نا نیشنل پریس کلب تون خڑکی رابطہ جوان ءُ ہیت اسے، داڑآن کسبی لائخیک جوان مریرہ۔ اودیر بالا پریس کلب نا عہدیدار آتے باوری کرفے کہ زوت دیر بالا پریس کلب نا دورہ ءِ کیوہ۔ اوپارے کہ صحافی تینا ہندی، علاقہ نا ویل آتے تالان کننگ تون اوار اوار ملکی فائدہ غاتا بیانیہ نا مون آ دننگ کن کلیدی ءُ کڑد اس ادا کیک۔ اوپارے کہ وزیراعظم عمران خان کابینہ نا گیشتر دیوان تیٹی سرکاری ملازم آتا ذکر ءِ کرسا کرینے۔ وزیراعظم تعلقدار کمامدار آتے پارت جاری کرے کہ سرکاری ملازم آتا تنخواہ تا ویل ءِ زوت ایسر کننگے دا چرجوئی ٹی بڑزکو کہولی کابینہ کمیٹی اس ہم جوڑ ءِ ہراٹی بنجائی وزیر پرویز خٹک، شیخ رشید، عبدالحفیظ شیخ اوار ءُ۔ دا کمیٹی ملازم آتون گپ وتران کننگ ءِ، برانز کروک آ است جم مریرہ۔ اوپارے کہ اینو نا ویل انا بنداوی سوب مسکوہی حکومت آتا نابودی و ڈٹ بندی نا کمتی ءِ۔ اوپارے کہ غٹ تر چیلنج، کورونا دین انا جہانی دین آن پد ہم ملکی زرگزران ءِ دُوارہ بحال کرین۔ تعمیرات، ٹیکسٹائل تون اوار ہر بشخ اٹی گچینی بسنے ڈیہہ نا ایلو ملک آتا نسبت پاکستان نا زرگزرانی کارکڑدبھاز گچین ءِ۔ اوپارے کہ بروک آ دے تیٹی کبینی ٹی کمتی و روزگار نا وارخواہی ودی مریک۔ اوپارے کہ اسلام آباد تون اوار مچ آ ملک انا صحافی تے جان جوڑی کارڈ فراوان کننگ نا سلاہ ءِ وزیراعظم ءِ تننگک۔ اوپارے کہ نان گام گیج آتا بھرم الس اسکان سرمننگ بناکرینے۔
