اسلام آباد۔ 10 فروری (اے پی پی) پاکستان نا غٹ سیل و سواتی ہند آتیا ملکی و درملکی سیل و سواتی تا آسراتی کن ہلہلہ ئی بنداو تیا ٹیلی کمیونیکیشن و براڈ بینڈ سروس نا فراوانی کن سنبرینگوک اُن، سیل و سوات نا مون آ دننگ ملکی زرگزران نا سوگوی ٹی بنداوی کڑد ادا کننگ کیک، داہمووخت آ مننگ کیک کہ سیل و سواتی تے غٹ المی آسراتی تا فراوانی ءِ پک کننگے۔ داخیال آتا درشانی ءِ بنجائی وزیر انفارمیشن ٹیکنالوجی و ٹیلی کمیونیکیشن سید امین الحق و وزیراعظم نا خصوصی کمکار سید ذوالفقار عباس بخاری ئسک چارشنبے نادے آ وزارت آئی ٹی و ٹیلی کمیونیکیشن نا ادارہ یونیورسل سروس فنڈ انا رداٹ چترال، لوئر و اپر دیر نا علاقہ غاتیٹی براڈ بینڈ انا فراوانی نا ڈٹ آتیا دستخط آتا دود آن تران کرسا کریر۔ معاہدہ غا دستخط یونیورسل سروس فنڈ انا چیف ایگزیکٹو حارث محمود چوہدری و ٹیلی نار نا چیف ایگزیکٹو آفیسر عرفان وہاب خان ئسک کریر۔ ڈٹ انا رداٹ، چترال، اپرولوئر دیر نا پسماندہ علاقہ غاتا الس ءِ اسہ ارب 37 کروڑ روپئی نا خڑچ آن براڈ بینڈ سروس فراوان کننگک ہرا 18 ہزار مربع کلومیٹر نا علاقہ ءِ کورکیک ہراڑآن نئے بیرہ علاقہ ٹی طالب علم بلکن چنکاکاروباری بندغ آتے ہم تیز ترین انٹرنیٹ سروس دُوبریک وخت اس کہ ڈٹ آن ہندی کہول آ روزگار نا وارخواہی ہم ودی مریک۔ دود اٹ بحیثیت مہمان خاص تران کرسا بنجائی وزیر آئی ٹی سید امین الحق پارے کہ ننا وزارت نا پبی کوشست ءِ کہ وزیراعظم پاکستان نا ڈیجیٹل پاکستان وژن نا پوروی کن غٹ وسیلہ غاتے کاریم اٹ اتنگ مرے۔
