اسلام آباد۔ 10 فروری (اے پی پی) چیئرمین سینیٹ محمد صادق سنجرانی پارینے کہ پاکستان سارک ملک آتون ہڑتوم آ کنڈآتا کمکاری ءِ علاقائی شونہالی کن بھاز اہمیت ایتک، پاکستان و نیپال بین الپارلیمانی یونین، ایشیائی پارلیمانی اسمبلی و ایلو اہم فورم تیا بے مٹ کمک نا درشانی ءِ کرینو، ہڑتوم آ ملک آک دا جہانی فورم تے ڈیہہ نا گچین آخبت و شونہالی کن کاریم اٹ اتنگ کیرہ۔ داخیال آتا درشانی ءِ او نیپال نا سفیر تاپس آدھیکاری تون گپ وتران کرسا کرے ہراچارشنبے نادے آ داڑے پارلیمنٹ ہاؤس اٹ اوڑتون اوڑدہی کرے۔ اواوڑدہی ٹی ہڑتوم آ کنڈآتا و پارلیمانی تعلقداری تا بابت اہم باندات آ گپ وتران کننگا۔ چیئرمین سینیٹ محمد صادق سنجرانی پارے کہ پاکستان سارک ملک آتون ہڑتوم آ کنڈآتا کمکاری ءِ علاقائی شونہالی کن اہم تکک، پاکستان ونیپال بین الپارلیمانی یونین، ایشیائی پارلیمانی اسمبلی و ایلو اہم فورم تیا بے مٹ کمکاری نا درشانی ءِ کرینو۔ اوپارے کہ ہڑتوم آ ملک آتا نیام اٹ پارلیمانی کہول آ رابطہ کاری کثیر الجہتی کمکاری کن اہم ءِ ، ہڑتوم آ ملک آک دا جہانی فورم تے ڈیہہ نا گچین آخبت و شونہالی کن کاریم اٹ اتنگ کیرہ۔ چیئرمین سینیٹ نیپالی سفیر ءِ بھارتی فوج انا مقبوضہ کشمیر اٹی برجا ظلم و انسانی حق انا خلاف ورزی تا بارواٹی معلومدار کرے۔ اوپارے کہ بھارت مقبوضہ کشمیر اٹی ظلم و انسانی حق انا خلاف ورزی کننگ ءِ، بھارت اقوام متحدہ نا سیکورٹی کونسل نا قرارداد و جہانی کانود نا پاش آن پاش خلاف ورزی کننگ ءِ، پاکستان کشمیر تون اوار غٹ ویل آتا ایسری ءِ پرامن وڑاٹ خواہک۔ اوپارے کہ کشمیر نا ویل انا ایسری کشمیری الس نا است خواہی و اقوام متحدہ نا قرارداد آتا رداٹ قابل قبول مریک۔ اوپارے کہ پارلیمانی رابطہ کاری کن پاکستان نیپال پارلیمانی فرینڈ شپ پڑک ءِ گچین کڑد ادا کروئی مریک، السی کہول آ رابطہ و پارلیمانی سفارتکاری نا مون آ دننگ کن پارلیمانی فرینڈ شپ پڑک گچین کڑد ادا کننگ کیک۔ چیئرمین سینیٹ پاکستان و نیپال نا پارلیمانی ڈل آتیٹی ترندی اتنگ آ ہم زور شاغا۔ اوپارے کہ نیپال نا پارلیمان پاکستان نا ادارہ پارلیمانی خذمت آن ہیلکاری ورک شاپس و نیپال نا پارلیمان نا باسک و اسٹاف نا کاریم نا کچ ءِ ودفنگ کن فائدہ ہرفنگ کیک، ادارہ جارتی رابطہ غاتا رداٹ اسہ ایلو نا آزموندہ غاتیان بھاز گڑا ہیل کننگ مریک۔ واپار، تعلیم و ایلو بشخ آتیٹی ہم کمکاری و رابطہ کاری کن بھلو گنجائش اس ساڑی ءِ۔ چیئرمین سینیٹ سفیر کن نیک است خواہی تا درشانی ءِ کرے۔ اواومیت ظاہر کرے کہ سال 2021 پاکستان و نیپال نا ہڑتوم آ کنڈآتا تعلقداری،پارلیمانی رابطہ غاتا سوگوی و کمکاری کن اسہ گچین ءُ سال اس جوڑ مریک۔
