پاکستان تحریک انصاف نا حکومت دینی مدرسہ غاتون اوار ہِننگ نا فیصلہ کرینے، بنجائی وزیر تعلیم و کسبی تربیت شفقت محمود

اسلام آباد۔ 10 فروری (اے پی پی) بنجائی وزیر تعلیم و کسبی تربیت شفقت محمود پارینے کہ پاکستان تحریک انصاف نا حکومت دینی مدرسہ غاتون اوار ہِننگ نا فیصلہ ءِ کرینے، ننا مشن تعلیم ءِ زیات آن زیات مون آ دننگ نا ءِ۔ چارشنبے نادے آ بنجائی تعلیمی بورڈ اٹی مدرسہ غاتا طالب علم آتیٹی سند بشخنگ(مساوی) نا دود آن تران کریکہ۔ داوخت آ اوپارے کہ ننا مشن تعلیم ءِ زیات آن زیات مون آ دننگ نا ءِ، ننا حکومت دینی مدرسہ غاتون اوار ہِننگ نا فیصلہ کرینے۔ اوپارے کہ مدرسہ غاک چناتے تعلیم تننگ کن اہم خذمت سرتننگ ءُ و اوداڑکن حکومت آن اسہ روپئی اس ہم ہلپسہ۔ ریاست اوفتا خذمت ءِ امنا کیک و اوفتے اوار دننگ خواہک۔ اوپارے کہ تحریک انصاف نا حکومت ریاست و مدرسہ غاتا نیام اٹ خلیج ءِ چٹفے۔ بنجائی وزیر پارے کہ کچھی آن پنچ جماعت اسکان نصاب پورو مسنو۔ اسہ وڑ تعلیمی نظام آن راج اٹ تقسیم چٹک۔ ایلو بڑزکو تعلیمی ادارہ غاتیانبار مدرسہ غاتا طالب علم آتے ہم زند انا چندی بشخ آتیٹی مون آ ہِننگ نا موقع رسینگک۔ داوخت آ بنجائی وزیر مذہبی امور پیر نور الحق قادری پارے کہ پاکستان اٹ ہرا واکدارک ریاست و مدرسہ غاتا نیام اٹ دست و گریبان کرفنگ خوارہ ننے اوفتے تون مون تروئی ءِ۔ پاکستان نا دشمن تے تصادم کرفنگ اٹ سرسہب مننگ کن النگتو۔ اوپارے کہ پاکستان نا ہمو دینی مدرسہ ہرا شڑت آتیا پورو سلرہ اوفتے سند جاری کننگ نا چرجوئی بناکیک۔ وزارت تعلیم تہہ ٹی بھلو بدلی اس کننگ ءِ تانکہ مدرسہ غاتا معاملہ جوانی اٹ مون آ کائے۔ مدرسہ غاتا نظام ءِ پین سوگو کننگ اُن اوفتے نزور مننگ کن الیپنہ۔ دود انا ایسر آ مدرسہ غاتا طالب علم آتیٹی تعلیمی سند(مساوی) بشخنگا۔ داوخت آ بنجائی تعلیم بورڈ انا چیئرمین قیصر عالم و ایلوبڑزکو کمامدارآک ہم ساڑی ئسر۔