فارن سروس اکیڈمی نا کمک اٹ آفیسر آتا کاریم نا کچ ءِ ودفنگ کنا اولیت ءِ، وزیر خارجہ مخدوم شاہ محمود قریشی

اسلام آباد۔ 10 فروری (اے پی پی) وزیر خارجہ مخدوم شاہ محمود قریشی پارینے کہ فارن سروس اکیڈمی نا کمک اٹ آفیسر آتا کچ ءِ ودفنگ کنا اولیت ءِ۔ فارن سروس آف پاکستان، ملکی فائدہ غاتا رکھ اکن ادا کروک آ خذمت آتا پروقار میراث ءِ، پاکستانی سفارت کاری تینا کاریم نا کچ آن زیات کاریم کننگ نا لائخی نا پن ءِ، تینا ہدف آتا دوئی کننگ کن پوسکن آ ٹیکنالوجی و میڈیا غان فائدہ ہرفسا پبلک و زرگزرانی سفارتکاری ءِ کاریم اٹ اتنگ انگ ءِ۔ چارشنبے نادے آ چِل می خصوصی ڈپلومیٹک کورس انا ایسری دود آن تران اٹی وزیر خارجہ چِل می خصوصی ڈپلومیٹک کورس انا بشخ ہلوک آتے سرسہبی اٹ کورس ءِ پورو کننگ آ مبارکباد پیش کرسا پارے کہ اینو نم تینا تسخیر ذات، شعوری بالیدگی، و ملک وقوم انا خذمت نا سفر آ روانگی کن اولیکو گام ءِ ہرفنگ والا اورے۔ وزیر خارجہ پارے کہ فارن سروس آف پاکستان، ملکی فائدہ غاتا رکھ اکن ادا کروک آ خذمت آتا و پروقار میراث ءِ۔ پاکستانی سفارتکاری نا بارواٹی پاننگک کہ دا تینا کاریم آن کچ آن زیات کاریم کننگ نا لائخی نا پن ءِ۔ وزیر خارجہ بشخ ہلوک آتا کنڈآ ہُرسا پارے کہ نم اسہ ہندن ءُ وخت اسے ٹی سفارت کاری نا دنیا ٹی گام ءِ تخنگ اورے ہراتم منظرنامہ ترندی اٹ بدل مننگ ءِ، دنیا غیر یقینی حالیت آتیان دوچار ءِ، تاریخ نا پہیہ پورو وڑاٹ حرکت اٹی ءِ۔ دا سروس نمے آن متقاضی ءِ کہ نم داٹی اوار مننگ تون جیوپولیٹیکل رداٹ نظر تخسا تینا ملکی فائدہ غاتا رکھ ءِ پک کیرے و یکتا وڑاٹ مون تروک چیلنج آتا مقابلہ ءِ کیرے۔ نمے دا زمواری و اومیت آتے مدام مون آ تخوئی ءِ ہرافتے دا ادارہ و قوم نمتون وابستہ کرینے۔ اوپارے کہ فارن سروس اکیڈمی نا کمک اٹ آفیسر آتا کاریم نا کچ ءِ ودفنگ، بطور وزیر خارجہ کنا اولیت آتیٹی اوار مسنے۔ ای تینا چینی سنگت آتا منت وار اُٹ ہرافتا توسط اٹ نن نما تربیت کن دا جاگہ ءِ دوئی کننگ اٹ سرسہب مسن، نن دا اکیڈمی ءِ پین گچین کننگ کن سنبرینگوک اُن۔ وزیر خارجہ پارے کہ ای وزارت خارجہ کن، نم کن پوسکن آ چیلنج آتون مون تننگ و کاریم نا کچ اٹی ودکی کن وژن ایف اوتسنے، دا وژن نا رداٹ بھاز انگا اصلاحات درستی راستی کرفنگانے۔ تینا ہدف آتا دوئی کننگ کن پوسکن آ ٹیکنالوجی و میڈیا غان فائدہ ہرفسا پبلک و زرگزرانی سفارت کاری ءِ کاریم اٹ اتنگ انگ ءِ۔ وزیر خارجہ پارے کہ ای خواوہ کہ ننا سفارت کار اسہ جوان ءُ ٹیم ممبر اسے نا وڑاٹ ہدف آتا دوئی کننگ کن یکتا سوچ تخر و اوفتا گپ وتران، اوفتا جوزہ غاتا جاگہ غا اوفتا فہم و فراست نا عکاسی ءِ کے۔ اینو ادارہ غاتا کہول آ دفترخارجہ نا بیانیہ متنوع، مربوط و موثر ءِ، ننے تینے پوسکن آ خواست آتون ہم گرنچ کروئی ءِ۔