بلوچستان آن سینیٹ گچین کاری کن چندی سیاسی و مذہبی جماعت آتا 54 اومیتدار پندار کاغد الیکشن کمیشن آف پاکستان کوئٹہ غان ہلکر

کوئٹہ۔ 10 فروری (اے پی پی) بلوچستان آن سینیٹ گچین کاری کن چندی سیاسی و مذہبی جماعت آتا 54 اومیتدار پندار کاغد الیکشن کمیشن آف پاکستان کوئٹہ دفتر آن ہلکنو۔ چارشنبے نادے آ الیکشن کمیشن آف پاکستان نا اسہ عہدیدار اس ایسوسی ایٹڈ پریس آف پاکستان ءِ پارے کہ مارچ اٹی مروک آ سینیٹ گچین کاری کن پاکستان تحریک انصاف، بلوچستان نیشنل پارٹی، بلوچستان عوامی پارٹی، جمعیت علمائے اسلام، بلوچستان نیشنل پارٹی عوامی و آزاد اومیتدار آک پندار کاغد ہلکنو۔ یات سلے کہ سینیٹ نا خورک مروک آ 48 نشست آتیا مچ آ ملک اٹی گچین کاریک مارچ اٹی مننگ ءُ ہرافتیان بلوچستان نا سینیٹ کن 12 نشست آتیا پولنگ مریک، ہراٹی 7 جنرل، 2 ٹینوکریٹ، عالم دین، اقلیت نا 1 و زالبول آتا 2 نشست اوار ءُ۔ الیکشن کمیشن نا رداٹ اومیتدار سہب انا 9 بجہ غان شام انا 5 بجہ اسکان پندار کاغد ہلنگ کیرہ وخت اس کہ سینیٹ الیکشن نا شیڈول 11 فروری 2021ء آ جاری کننگک۔ الیکشن کمیشن نا رداٹ بلوچستان آن سینیٹ نا جنرل نشست آتیکن 27 اومیتدار اقلیت نا نشست کن 5 اومیتدار زالبول آتا نشست آتیکن 10 اومیتدار و ٹیکنوکریٹ/عالم دین تا نشست آتیکن 12 اومیتدار پندار کاغد وصول کرینو۔