صوبائی وزیر کشت وکشار انجینئر زمرک خان اچکزئی نا ’’اے پی پی‘‘ تون گپ وتران

کوئٹہ۔ 09 فروری (اے پی پی) صوبائی وزیر کشت وکشار انجینئر زمرک خان اچکزئی پارینے کہ بڑزکو و آب اٹ تعلیم نا دوئی کننگ آن نن پائیدار شونداری نا ہدف آتے دوئی کننگ کینہ۔ صوبہ غان تعلیمی پسماندگی نا چٹفنگ و تعلیم نا مون آ دننگ کن حکومت تون غٹ ءِ تینا کلیدی کڑد ادا کروئی مریک۔ داخیال آتا درشانی ءِ او سے شنبے نا دے آ ’’اے پی پی‘‘ تون گپ وتران کرسا کرے، اوپارے کہ ننا ورناک علم انا دوئی کننگ ءِ تینا شعار کیر و تینا نہادی وخت ءِ علم انا دوئی کننگ اٹ خڑچ کیر۔ صوبائی وزیر کشت وکشار انجینئر زمرک خان اچکزئی مستی پارے کہ صوبہ ٹی آب اٹ تعلیم ءِ لس کننگ کن صوبائی حکومت ہر کہول آ گام گیج کننگ ءِ، ولے دا چرجوئی ٹی ایلو خوانفوک تنظیم، لمہ و باوہ و غٹ مکاتب فکر انا خلقت ءِ تینا پبی کڑد ادا کروئی مریک۔ اوپارے کہ تعیم نا دوئی کننگ نا رُمب اٹ اوار مننگ آن بیدس نن نئے شونداری نا ہدف آتے دوئی کننگ کینہ و نئے سہی وڑاٹ صوبہ نا حق انا دفاع ءِ کننگ کینہ۔ اوپارے کہ حکومت صوبہ نا غٹ ضلع غاتیٹی تعلیم نا مون آ دننگ و ورناتے آب اٹ تعلیم فراوان کننگ اٹ گچین ام گیج کننگ ءِ، و ورناتا ہرکہول آ است بڈی برجاتخک۔