اسلام آباد۔ 09 فروری (اے پی پی) پاکستان تحریک انصاف نا راہشون و پارلیمانی سیکرٹری ریلوائی فرخ حبیب پارینے کہ مسلم لیگ (ن) فارن فنڈنگ نا بانی ءِ، جندال پاکستان نا ادارہ غاتا برخلاف مہم جوئی کن بیدس ویزہ غان ڈالر آتا بیگ ءِ پُر کرسا مری ٹی شریف خاہوت نا حوالہ کرسا کرے۔ ملک ءِ نزور کروک آ پی ڈی ایم نا تحریک ءِ اِرا ملک آن فنڈنگ بننگ ءِ، مریم صفدر ءِ نرنگ کن الیپنہ۔ اودے ورندی تروئی تمک۔ سے شنبے نادے آ الیکشن کمیشن نا پیشن میڈیا تون گپ وتران کرسا اوپارے کہ مریم صفدر تینا فارن فنڈنگ نا ورندی ءِ تننگ نا جاگہ غا گالم گلوچ برگیڈ ءِ مون آ اتیک، تحریک انصاف تینا چِل ہزار ڈونرآتا پورو ریکارڈ ءِ الیکشن کمیشن ءِ پیش کرینے، تحریک انصاف سالمیت پاکستان نا برخلاف فارنر اسے آن روپئی اس ہم التنے۔ تحریک انصاف نا غٹ فارن فنڈنگ بینکنگ چینل نا کمک اٹ بس، ویسٹرن یونین نا کمک اٹ مچ آ دنیا ٹی فنڈز ٹرانسفر مریک، دا حوالہ ہنڈی آنبار بے نامی مفک، اپوزیشن نا فنڈز فالودہ، پاپڑوالاو مشتاق چینی نا کمک اٹ حوالہ ہنڈی اٹ پیسہ غاتے گدریفسا کرے۔ پردیسیک تحریک انصاف ءِ پوسکن آ پاکستان اس جوڑ کننگ کن فنڈنگ کریر۔ ننے اسرائیل ءِ امنا کننگ نا طعنہ تروک آک تینٹ 1998ء ٹی تینا ہمووخت انا وزیر مذہبی امو رءِ اسرائیل آ گدریفیر۔ اوپارے کہ اسامہ بن لادن آن بے نظیر بھٹو ءِ اینک کننگ کن، ہلوک آ 10 ملین ڈالر نا احساب ءِ اوفتے تروئی مریک۔
