اسلام آباد۔ 09 فروری (اے پی پی) جہانی بینک و ایشیائی شونداری بینک احساس پروگرام نا ستاءِ کرسا پارینو کہ پاکستان نا حکومت کورونا دین انا جہانی دین اتون مون تننگ کن راج انا نیزگار تپہ خاص کر زالبول ءِ دا پروگرام نا رداٹ نغد کمکاری ٹی کم و ود 3 ہنداخہ پین ودکی کرینے، بے نظیر انکم سپورٹ پروگرام و احساس کفالت سویلی ایشیاء نا ڈیہہ ٹی راجی رکھ انا غٹ آن بھلا پروگرام مسنے۔ داہیت ءِ سویلی ایشیانا ڈیہہ کن جہانی بینک انا نائب صدر ہارت ویگ شیفر و ایشیائی شونداری بینک انا نائب صدر آپریشنز شاکسن چن تینا اسیجائی بلاگ اٹی پارینو۔ جہانی بینک و ایشیائی شونداری بینک انا اہم عہدیدار آک راج انا نیزگار و نزور تپہ غاتیکن پاکستان نا حکومت نا کنڈآن راجی رکھ انا جامع احساس پروگرام نا رداٹ نغد امداد نا فراوانی نا ستاءِ کرینو وپارینو کہ احساس پروگرام تنکی نا وخت اٹی راج انا نیزگار و نزور تپہ غاتے راجی رکھ انا پروگرام نا کمک اٹ ڈیجیٹل کمکاری نا کمک اٹ دمدستی امداد نا فراوانی نا اسہ عظیم ءُ مثال اسے۔ دا پروگرام نا رداٹ ضرورت مند بندغ آک تینا شناختی کارڈ انا کمک اٹ ٹیکسٹ میسج نا کمک اٹ درخواست ایترہ۔ زرتس آن مست بائیومیٹرک وڑوڈول اٹ درخواست تروک آنا کوائف آتے ہُننگک۔ دامبنی بر ڈیٹا، آٹومیٹڈ و سیاسی وڑاٹ بے کنڈہلوک راجی رکھ انا پروگرام اسے۔ اوپارے کہ تدوک آ سال مارچ آن ہلیس داتم اسکان پاکستان نا حکومت راج انا نیزگار و نزور تپہ غاتیا دین انا اثرآتے کم کننگ کن راجی رکھ انا پروگرام نا رداٹ نغد امداد نا فراوانی ٹی کم و ود 3 ہنداخہ پین ودکی کرینے۔ داپروگرام نا رداٹ 1 کروڑ 50 لکھ آن زیات خاہوت خاص کر زالبول ءِ نغد کمک فراوان کننگانے۔ جہانی بینک انا نائب صدر ہارت ویگ شیفر و ایشیائی شونداری بینک انا نائب صدر آپریشنز شاکسن چن پارینو کہ داغٹ بے نظیر انکم سپورٹ پروگرام و احساس کفالت پروگرام کن زیات فنڈ جتا کننگ و راجی رکھ انا بشخ آتیٹی زرکاری ٹی ودکی نا سوب ممکن مسنے۔ ہڑتوم آ پروگرام سویلی ایشیانا ڈیہہ ٹی راجی رکھ انا غٹ آن بھلا پروگرام جوڑ مسنے۔ احساس کفالت پروگرام قومی راجی و اقتصادی رجسٹری نا بنداو آ چلینگ انگ ءِ ہراٹی ملک انا 85 درسد آبادی نا ڈیٹابیس ساڑی ءِ۔
