بلین ٹری ڈٹ پاکستان نا بقاء کن بھاز اہم ءِ، ملک امین اسلم نا پریس کانفرنس

اسلام آباد۔ 09 فروری (اے پی پی) وزیراعظم نا خصوصی کمکار ماحولیات ملک امین اسلم پارینے کہ بلین ٹری ڈٹ پاکستان نا بقاکن بھاز اہم ءِ اپوزیشن دا باندات آ سیاست کپ، 2012ء نا مقابلہ ٹی اینو جنگل آتا کاٹ کننگ اٹ پدریسہ کمتی بننگ ءِ، شیخوپورہ نا خڑک کوزہ مافیا غان 3500 ایکڑ ڈغار ءِ ہلسا درخت خلنگا، 1990ء آن پد پاکستان اٹی مینگروز نا جنگل آتیٹی 300 درسد ودکی مس، بلین ٹری ڈٹ انا رداٹ اسہ ارب پین مینگروز خلینہ۔ اقوام متحدہ ننا ڈیٹا و معلومداری تے مستند گوندا، وخت اس کہ بھارت و نیپال ءِ جزوی گوندنگانے۔ داخیال آتا درشانی ءِ او سے شنبے نادے آ داڑے پریس کانفرنس کرسا کرے۔ اوپارے کہ موسمیاتی بدلی آ دوشنبے نادے آ وزیراعظم عمران خان ءِ حوال تننگاہراٹی پاکستان اٹ موسمیاتی تغیر آتا جاچ ءِ ہلنگا، ٹرانسپورٹ، انرجی و ایلو بشخ آک چاگڑد کن مضر گیس ودی کیرہ۔ اوپارے کہ ننا اسہ جہانی ءُ معاہدہ اسے و نن پُر اومیت اُن کہ 2030ء اسکان موسمیاتی تغیر آتے توننگ اٹ سرسہب مرینہ۔ اوپارے کہ کاربن نا اخراج آ نن اسہ سٹڈی اس کرفین، انرجی سیکٹر اٹ کاربن نا اخراج اٹ ودکی مسنے، ایندھن نا گرج آتے پورو کننگ کن کولا نا کاریم اٹ اتنگ نا سوب آن جنگل آتے کاٹ کننگاکہ ولے 2012آن پد جنگل آتا کاٹ کننگ اٹ کمتی بننگ بناکرے۔ 2012ء اسکان 12000ایکڑ نا رقبہ غا درخت آتے کاٹ کننگاکہ و حکومت کوشست آتا سوب آن دا کچ کم مرسا 8000ایکڑ نا خڑک مسنے۔ اوپارے کہ سندھ و بلوچستان اٹی جنگل آتا کاٹ کننگ زیات ءِ وخت اس کہ دا بابت خیبرپختونخوا ٹی دا کچ کم ءِ۔ اوپارے کہ دنیا ٹی ہرا ملک آک کاربن نا اخراج کننگ ءُ داسہ ہم نن اوفتیان کم اُن، غٹ آن زیات کاربن نا اخراج کروک آ ملک آتیٹی چین، بھارت و امریکہ ءُ، بلین ٹری، ٹین بلین ٹری سونامی ڈٹ آن ماحولیات آ جوان ءُ اثراس تمک، و 500 ملین ٹن کاربن تہوآن پیش تمک، دا ہڑتوم آ پروجیکٹ پاکستان نا بقاء کن بھاز اہم ءُ، اپوزیشن دا باندات آ سیاست کپ۔ اوپارے کہ بلاول و مریم ءِ پارینن ہرا جنگل آتا پارہ اوفتے نشان ایتنہ۔ اوپارے کہ 1990آن پد پاکستان نا مینگروز اٹی 300 درسد ودکی مسنے، بلین ٹری ڈٹ انا رداٹ اسہ ارب پین مینگروز خلینہ۔ اوپارے کہ بلیو کاربن نا پن اٹ سمندر اٹ کاربن نا سٹڈی کننگ اُن۔ ہراٹی ورلڈ بینک کمک کننگ ءِ، اقوام متحدہ ننا ڈیٹا و معلومداری تے مستند گوندا وخت اس کہ بھارت و نیپال ءِ جزوی گوندنگانے۔ ملک امین اسلم پارے کہ پاکستان ماحولیاتی بدلی آن زہمی انگا ملک آتیٹی اوار ءِ، پاکستان اٹ اوسط درجہ حرارت ءِ اسہ ڈگری ودفنگانے، پِرتا کساس 20 درسد ودا، باسنی نا موسم ودفنگ انگ ءِ۔ اوپارے کہ شار تیٹی نوکاپ نا بننگ بناکرینے۔ تدوک آ حکومت لاہور اٹی 70 درسد درخت کم کرے، دا غٹ ویل آتا ایسری بیرہ شجرکاری ءِ، دا سال شجرکاری مہم نا فوکس شار تیٹی درخت خلنگ ءِ۔ اوپارے کہ پاکستان اٹی ہم برفانی جھیل آک ودنگ ءُ، مسہ سال مست 30 جھیل ئسر داسہ 150 مسنو، داگڑتی نا سوب ءِ، داجھیل تیا وخت آن مست آگاہی سسٹم خلنگ اُن۔ اوپارے کہ 2023اسکان 3.2 بلین درخت خلنگ نا ڈٹ ءِ، ٹین بلین داخاطرآن پانہ کہ بروک آ پنچ سال ہم پاکستان تحریک انصاف نا حکومت مریک و داڈٹ پورو مریک، ٹین بلین ٹری نا ڈٹ بیرہ درخت خلنگ نا ڈٹ اف، بلین ٹری ڈٹ اٹی ہنی، زیتون، نا ڈٹ آتے ہم بناکننگ اُن۔ وائلڈ لائف ڈٹ ءِ ہم مون آ دننگ اُن۔ اوپارے کہ کورونا نا دین اٹی 85 ہزار مخلوق ءِ ملازمت تننگا، دا ڈٹ آتا مانیٹرنگ، صوبہ، بنجا تینٹ کیرہ، تھرڈ پارٹی آزادانہ مانیٹرنگ کیک، سپارکو، ڈیلی ڈبلیو ایف ہم مانیٹرنگ کیک، ناروے و برطانیہ نا ماحولیات نا وزیر آک ڈٹ آتا ستاءِ کریر۔