اسلام آباد۔ 09 فروری (اے پی پی) وزیر خارجہ مخدوم شاہ محمود قریشی پارینے کہ سپریم کورٹ آئین نا تشریح کن غٹ آن جوان ءُ فورم اسے، نن تینا درخواست ءِ عدالت عظمیٰ ٹی پیش کرینن، انت کہ فیصلہ اس مریک، نن اونا شرف ءِ کینہ۔ اپوزیشن اینو ہم کرپٹ پریکٹس آتے رکھ تننگ خواہک۔ وکیل آک تینا موقف کن کانودی کسر ءِ بایدے اختیار کروسر۔ سے شنبے نادے آ ملک انا جم سیاسی و علاقائی حالیت آتا بابت بیان اٹی وزیر خارجہ پارے کہ نن عدالت عظمیٰ نا بھاز شرف ءِ کینہ و دا آئین نا تشریح کن غٹ آن جوان ءُ فورم اسے۔ نن تینا درخواست ءِ عدالت عظمیٰ ٹی پیش کرینن انت کہ راہشونی اس ایتک نن اونا شرف ءِ کینہ۔ اوپارے کہ ننتون اِراکسر ئسر۔ اسٹ دا کہ نن آئینی تشریح کن عدالت نا پلو ءِ ہلین، ارٹ میکو کسر دائس کہ نن آئین اٹ ترمیم کن مون آ برین، انتئے کہ ننتون اِراتہائی گیشتری اف۔ شاہ محمودقریشی پارے کہ پیپلزپارٹی و مسلم لیگ نون ہرا مہالو جمہوریت نا شئیر ءِ خلسا کریر اوپن ووٹنگ نا خواست ءِ کرسا کریر اینو تینا وعدہ غاتیان چپ خننگ انگ ءُ، او اینو ہم کرپٹ پریکٹس آتے رکھ تننگ خوارہ۔ اپوزیشن کنفیوژن نا گواچی ءِ۔ پی ڈی ایم نا فائدہ غاک اسہ کنڈآ و سیاست ایلو کنڈآ۔ اوپارے کہ نن اپوزیشن ءِ مذاکرات نا سلہ خلکن، اسپیکر چیمبر اٹ ننا نشست مس نن اپوزیشن ءِ چارٹر آف ڈیموکریسی نا رداٹ موقع تسن۔ اگہ دا چارٹر آف ڈیموکریسی آ باور کپسہ تو وضاحت کیر کہ اوفتا فائدہ، چارٹر آف ڈیموکریسی تون مطابقت تخپک۔ وزیر خارجہ پارے کہ ڈی جی آئی ایس پی آر وضاحت کرینے کہ اودے بے سوب آن سیاست اٹ چکنگپ۔ اسہ کنڈآ او دیکی سیم آ دہشت گرد آتون مون تننگ ءُ تو ایلو کنڈآ او بلوچستان اٹی پاکستان ءِ نزور کروک آتون برسرپیکار ءُ۔ وزیر خارجہ پارے کہ پی ڈی ایم تون گنڈوک گڑاس زموار، تینا سیاست ءِ چمکائنفگ کن ادارہ غاتے بے سوب تنقید نا شست کرسا دشمن نا بیانیہ نا مخ تفی ءِ کننگ ءُ۔ پی ڈی ایم نا گڑاس مخلوق چنائی ءُ بیان تننگ ءُ۔ اوپارے کہ افضل گرو و داوڑنا کشمیری حریت پسند آتا عظمت ءِ نن سلام پیش کینہ اوفتا قربانیک ضرور رنگ اس اتیرہ۔ اوپارے کہ کوہ پیماتا پٹنگ کن پاک فوج و حکومت ہروڑ کوشست کننگ ءُ۔ کنا آئس لینڈ نا وزیر خارجہ تون دا بابت ہیت مس اودے ہم نن معلومدار کرینن۔ بدبختی اٹ ہندن ہندن وخت گدرینگ انگ ءِ نن نااومیتی نا کنڈآ ہِننگ اُن۔ وزیر خارجہ پارے کہ کنا خیال اٹ درو ہرا اسلام آباد بار اٹی حالیت مون آ بس اوڑآن مون انگا کوٹ انا شرف اٹ ہچ ءُ ودکی اس متنے۔
