پشاور۔ 09 فروری (اے پی پی) صدر مملکت ڈاکٹر عارف علوی پارینے کہ ملک اٹی زرکاری کن چاگڑد سازگار ءِ و کاروبار اٹی آسانی کن اصلاحات برجاءِ، پوریا گر برادری خراج ادا کننگ ناترغیب تننگ نا کوشست آتیٹی تینا کڑد ءِ ادا کیر، اوغانستان اٹی امن آن خیبرپختونخواءِ فائدہ و علاقائی واپار ءِ مون آ دننگک۔ صدر مملکت داخیال آتا درشانی ءِ گورنر ہاؤس پشاور اٹی خیبرپختونخوا نا کاروباری برادری تون اوڑدہی ٹی کرے۔ گورنر خیبرپختونخوا شاہ فرمان، ایف پی سی سی آئی نا مسکوہی صدر غضنفر بلور،سرحد چیمبر آف کامرس اینڈ انڈسٹری نا صدر شیرباز الیاس و چیمبر نا ایلو عہدیدارآک ہم ساڑی ئسر۔ صدر مملکت پارے کہ پورو خراج زرتس آن واپاری نسخان ءِ کم کننگ و شونداری ڈٹ آتیکن فنڈ آتا فراوانی ٹی کمک رسینگک۔ پوریا گر برادری ملک اٹی خراج ادا کننگ نا ترغیب تننگ نا کوشست آتیٹی تینا کڑد ءِ اداکیر۔ صدر عارف علوی پارے کہ ساڑی حکومت نا کنڈآن کورونا نا دین اٹی 1.2 کھرب نا زرگزرانی ریلیف پیکج تننگانے، حکومت بزنس کمیونٹی ءِ مسابقتی کاروباری چاگڑد اس فراوان کننگ کن سنبرینگوک ءِ، ملک اٹی زرکاری کن چاگڑد سازگار ءِ و کاروبار اٹی آسانی کن اصلاحات برجاءِ۔ صدر مملکت پارے کہ پوریاگر برادری حکومت تون رابطہ غاتے پین جوان کے و کاروباری چاگڑد نا گچینی کن سلاہ ایتے۔ اوپارے کہ پاکستان اٹی سیل و سوات و آئی ٹی نا بشخ اٹی ساڑی وارخواہی تیان فائدہ ہرفنگ نا گرج ءِ۔ صدر مملکت پارے کہ اوغانستان اٹی امن آن علاقائی واپار ءِ مون آ دننگک و دانا غٹ آن مست خیبر پختونخوا ءِ فائدہ مریک۔ داوخت آ پوریا گر برادری کاروباری بشخ انا رکھ و علاقائی واپار نا مون آ دننگ کن حکومتی گام گیج آتا ستاءِ کرے۔ صدر مملکت ءِ نیامی ایشیائی ریاست آتون کراچی و گوادر نا بندرگاہ تا کمک اٹ واپار نا گمان و فائدہ غاتا بابت حوال تننگا۔
