احوال: یاسر عرفات
مٹ و بدل : سعادت خان محمد حسنی
ساڑی حکومت ملک اٹی بے اُراغریب بندغ و نیامی تپہ غاتیکن 50 لکھ اُراتا تفنگ نا ڈٹ انا بناءِ کرینے ہرا الس ءِ دوست بننگ ءِ۔ کورونا نا دین آن پد ہم تعمیراتی بشخ اتون گنڈوک صنعت آتے آسراتی تننگ و داصنعت آتون گنڈوک بندغ آتیکن روزگار نا وارخواہی آن تعمیرات و رئیل اسٹیٹ نا بشخ آتیٹی نمان سر جز ودی مسنے۔ حکومت تعمیراتی بشخ انا اہمیت ءِ مون آ تخسا دا صنعت نا آسراتی کن درکار کانود جوڑ کننگ تون اوار چندی بھرمی گام گیج کرے۔ خراج نا آسودہی نظام اس درستی راستی کرفنگا وخت اس کہ فکسڈ خراج نظام اٹی 31 دسمبر2021ء اسکان ودفنگ نا فیصلہ کننگا۔
ہندا وڑ رہن نا کانود نا مفننگ نا سوب ہائوسنگ نابشخ انا شونداری ٹی اسہ بھلو اڑاند اس ئس ولے سپریم کورٹ نا فیصلہ غان پد داویل داسہ ایسر مسنے۔ اسٹیٹ بینک آف پاکستان بینک آتیکن المی گوندانے کہ او تینا تعلقدار ڈومیسٹک پرائیویٹ سیکٹر کریڈٹ ناپنچ درسد بشخ ہائوسنگ و تعمیراتی صنعت ءِ ایترہ و دا گام اتون بینک آتا تعمیراتی فنانس کن زر 31 دسمبر 2021ء اسکان 378 ارب روپئی نا خڑک سر مریک۔ 5 مرلہ نا ہائوسنگ یونٹ آ اول پنچ سال اکن مارک اپ 5 درسد، بروک آ پنچ سال اکن 7 درسد، 10 مرلہ نا ہائوسنگ یونٹ آ اولیکو پنچ سال اکن مارک اپ 7 درسد و بروک آ پنچ سال اکن9 درسد ءِ وخت اس کہ وام 20 سال اسکان نا مد اکن ہلنگ ہلنگ مریک۔
لوکاسٹ ہائوسنگ ڈٹ آتیکن پوسکن آ پاکستان ڈویلپمنٹ ہائوسنگ اتھارٹی نا کنڈآن اسہ اُرا مسہ لکھ روپئی (اول اسہ لکھ ہائوسنگ یونٹس) نا کاسٹ سبسڈی تننگک۔ بلڈرز و ڈویلپرز آتے آسراتی تننگ کن نجی بشخ انا کنڈآن لوکاسٹ ہائوسنگ نا بابت حکومت ودکی گام گیج کننگ ءِ ہراٹی پوسکن آپاکستان ڈویلپمنٹ اتھارٹی پروجیکٹ آتا بناءِ کننگ اٹ اہم کڑد اداکیک و کم کٹیاکروک تپہ غاتیان تعلق تخوک آ بندغ آتے کاسٹ سبسڈی و مورگیج آسراتی فراوان کیک۔
پوسکن آ پاکستان ڈویلمنٹ ہائوسنگ اتھارٹی نا حساب وکتاب نا رداٹ بیرہ پنجاپ اٹی 162.81ارب روپئی مالیت نا تعمیراتی ڈٹ آتا بنا مسنے و 136.42 ارب روپئی نا ڈٹ منظوری نا ریسہ غاتیٹی ءُ۔داڑآن 1495.15ارب روپئی نا اقتصادی سرجزو ودی مریک و کم و ود 2 لکھ 50 ہزار بندغ آتے روزگار نا وارخواہی دُو بریک۔ ہنداوڑ خیبر پختونخواہ ٹی 28.49 ارب روپئی مالیت ناتعمیراتی ڈٹ آتا بنامس ہراڑآن 142.431 ارب روپئی مالیت نا اقتصادی سرجز و 27 ہزار روزگار نا وارخواہی ودی مس۔ اینخو مالی سال انا اولیکو پنچ تُو اٹی سرمٹ نا کل ترسیلات اٹی 16.61 درسد نا ودکی مس۔
دین انا ارٹ میکو ریسہ نا سوب آن حکومت بلڈرز و ڈویلپرز آتا آسراتی کن ہم غٹ ممکن گام گیج کرینے، داسہ بلڈرز و ڈویلپرز دوئی آسراتی و بھلو کچ اسے آ تعمیراتی سرجز آتا بناءِ کننگ نا فائدہ ءِ ہرفنگ کیرہ۔
الس ءِ اڑزان وام تننگ کن چندی گام گیج آتا رداٹ اسٹیٹ بینک آف پاکستان نا کنڈآن بینک آتے خصوصی پارت جاری کننگانے وخت اس کہ بینک آک الس ءِ اڑزآن اُراتا فراوانی نا مشن ءِ مون آ دننگ کن الس ءِ وام تا سرجم و دوئی کننگ نا وڑوڈول آن معلومدار کریر و وام تا فراوانی ءِ ممکن کریر۔ داکان مست بلڈرز و ڈویلپرز آتیکن منظوری ہلنگ مشکل ئس ولے داسہ حکومت ہائوسنگ و تعمیراتی بشخ انا آسراتی کن”منظوری نا وڑوڈول” ءِ ہم آسان جوڑ کرینے۔
اسٹیٹ بینک آف پاکستان حکومت نا کنڈآن ہائوسنگ فائنانس مارک اپ سبسڈی سکیم “میرا پاکستان میرا گھر” نارداٹ وام ہلوک آتا آسراتی ءِ مون آتخسا وام ہلنگ اٹ پیش بروک آ مشکل آتا رداٹ غاوتا درج کننگ کن سروس ڈیسک پورٹل و ہیلپ ڈیسک انا جوڑ کننگ ءِ گڈیکو دروشم اس تسنے۔ ہندآتا اڑزآن وام تا فراوانی کن حکومت پاکستان ناکنڈآن تروک آوام تیا مارک اپ سبسڈی نا بابت غاو سروس ڈیسک پورٹل نا کمک اٹ درج کننگ مریک۔ دُن تو وام تا فراوانی ٹی مشکل آتا حالیت اٹ صارف تعلقدار بینک اٹی ہم غاوتے درج کرفنگ کیک۔ داکان بیدس اسٹیٹ بینک آف پاکستان 15 شاراٹی اسٹیٹ بینک انا دفتر آتیٹی ہیلپ ڈیسک ہم جوڑ کرینے ہراڑے درخواست تروک آتا غاو تے ایسر کننگ کن ایس بی پی نا آفیسر و بینک آتا فوکل پرسن آک ساڑی مریرہ۔ صارف آتے پاننگانے کہ اوفک تینا غاو تا درج اکن بینک انا سرجم آتے فراوان کیر ہرانا برخلاف غاو درج کرفنگ مرے۔ اسٹیٹ بینک انا آن لائن پورٹل servicedesk.sbp.org.pk آ اولیکو وار سائن اپ کروئی مریک۔ پورٹل آ موبائل فون نمبر نا کمک اٹ لاگ ان کننگ مریک۔ بینک، بینک انا شاخ و شارانا پن ءِ گچین کرسا تعلقدار آفیسر نا پن اگہ معلوم مرےتو درج کننگ مریک۔ داکان بیدس صارف دا پورٹل نا کمک اٹ دستاویزی شاہدی ہم گدریفنگ کیک۔
ایسوسی ایشن آف بلڈرز اینڈ ڈویلپرز آف پاکستان (آباد) نا پیٹرن انچیف محسن شیخانی نارداٹ حکومت نا کنڈآن ہائوسنگ نا بشخ ءِ آسراتی نا سلہ غام بلڈرز فائدہ ہرفنگ ءُ، دا پیکج آن لکھ آ اُراتا تفنگ نا ہدف ءِ دوئی کننگ اٹ کمک رسینگک و یکبو نیم کروڑ بندغ آتیکن روزگار نا وارخواہی مریک۔ آسراتی پیکج نا ستاءِ کرسا اوپارے کہ پی ٹی آئی ناحکومت ہائوسنگ نا بشخ ءِ ملک انا 70 سال انا تاریخ اٹی اولیکو وار اسہ صنعت نا درجہ تس۔ دا پیکج تعمیراتی صنعت کن بھاز فائدہ مند ءِ۔ دا پیکج آن کنسٹرکشن انڈسٹری تون ملحقہ 72 صنعت آتے فائدہ رسینگک۔ ہرانا اثر لس بندغ آ تمک۔ ٹیکسیشن و ڈاکومینٹیشن نا خوف مفک و زرکاری ٹی ودکی مریک۔ او پارے کہ کورونا دین آن مچ آ دنیا ٹی اقتصادی شونداری ٹی سستی مون آ بس ولے وزیراعظم نا کنڈآن تعمیراتی بشخ اٹی آسراتی آن دا دین آن پد ہم ملک اٹی تعمیراتی سرجز آتے مون آ دننگا۔ خلقت ءِ روزگار ناوارخواہی دوبس۔ داوخت آ ملک اٹی تعمیراتی سرجزآک ترندی اٹ برجاءُ۔ تعمیراتی صنعت ننا زرگزران اٹ مرکزی حیثیت تخک و دانا مون آدننگ آن ہائوسنگ یونٹ آتا کاختی نا مون ءِ توننگ اٹ کمک رسینگک ہراٹی ملحقہ صنعت آک شون ہلیرہ و روزگار نابوارخواہی ودی مریک۔
پاکستان مورگیج ری فنانس کمپنی(پی ایم آرسی) نا منیجنگ ڈائریکٹر و چیف ایگزیکٹو آفیسر مدثر خان پارے کہ پی ایم آر سی جہانی بینک و حکومت نا کمک اٹ ری فنانسنگ نا آسراتی فراوان کننگ ءِ۔ اوپارے کہ نن 11شریدار بینک و مالیاتی ادارہ غاتے اوفتا روایتی و جدت آمیز اسلامی ری فنانسنگ پروڈکٹ آتیٹی 15 ارب روپئی ترسا مریس مد اڑزآن ہائوسنگ فنانس ءِ اسہ حقیقت اسے ٹی بدل کرینن۔ پی ایم آر سی کم خڑچ انا اُرا تیکن وام تروک آ بینک آتا است بڈی ءِ کننگ کن حکومت نا ٹرسٹی نا وڑاٹ رسک شیئرنگ نا آسراتی اس ہم درستی راستی کرفینے۔ کمپنی انشورنس انڈسٹری تون اواری اٹ پوسکن آ پاکستان پروگرام نا رداٹ کم خڑچ انا اُراتیکن پوسکن آ روایتی تکافل مصنوعات ہم تیار کرینے۔
پاکستان مورگیج ری فائنانس کمپنی لمیٹڈ نا سینئر فائنانشل سیکٹر اسپیشلسٹ ناموس ظہیر پاکستان ہائوسنگ فائنانس ڈٹ انا ستاءِ کرسا پارے کہ داڈٹ انا جوان ءُ بھرم اس مون آ بریک، ورلڈ بینک حکومت پاکستان و پاکستان مورگیج ری فائنانس کمپنی تون اواری اٹ پاکستان اٹ مورگیج فائنانس انڈسٹری نا شونداری کن کاریم کننگ ءِ۔ پاکستان نا 207 ملین آبادی ءِ و دا ترندی اٹ ودوک آ ملک آتیٹی اوار ءِ ولے بدبختی اٹ پاکستان اٹ ہند آتا کمتی مون تروک ءِ، داڈٹ انا کمک اٹ ننا کوشست ءِ کہ پرائمری مورگیج مارکیٹ نا کمک اٹ مخلوق ءِ اُراتا ملکیت نا حق فراوان کننگ نا کوشست آتے اٹ دوءِ سبک کننگے۔ بنجائی حکومت نا دا ڈٹ آن مست اسہ خاص ءُ تپہ اس بینک آتیان ہند آتا وام ہلنگ کریکہ ولے داڈٹ انا کمک اٹ کم کٹیا کروک آ بندغ آتے ہم ہند آتا اڑزآن وام تا فراوانی نا کوشست آتے سرسہب کننگ انگ ءِ۔ اونا پاننگ ئس کہ داڈٹ اٹی زالبول ءِ ہم ہند آتا مالکی نا حق انا تننگ نا عمل ءِ ترند کننگک۔ داوخت آ پاکستان نا کل آبادی نا بیرہ 2 درسد زالبول آتون ہند آتا مالکی نا حق ءِ۔ داڈٹ اٹی زالبول نا بشخ ہلنگ ءِ ودفنگ کن گام گیج کننگ انگ ءِ۔ اوپارے کہ لوکاسٹ ہوم فائنانس آن ملک اٹی تعمیراتی سرجز آتے ہم مون آ دننگک و تعمیراتی صنعت نا شونداری آن روزگار تون اوار ملحقہ صنعت آتے ہم فائدہ مریک۔ اوپارے کہ بنجائی حکومت و پلاننگ کمیشن آف پاکستان داڈٹ ءِ سرسہب کننگ کن ہروڑاٹ کوشست کننگ ءِ۔ ننے یقین ءِ کہ داڈٹ انا جوان ءُ بھرم اس دوئی مریک۔
تعمیراتی سرجز آتے مون آ دننگ کن حکومت نا کنسٹرکشن انڈسٹری کن خصوصی ریلیف پیکج نا ستاءِ کرسا آل پاکستان سرمٹ مینوفیکچررز ایسوسی ایشن نا چیئر مین اعظم فاروق پارے کہ پوسکن آ پاکستان ہائوسنگ پروگرام آن مارکیٹ اٹی کاروباری سرجز آک بحال مسنو۔ اسٹیل نا صنعت ہم فائدہ ہرفنگ ءِ۔ اوپارے کہ مشکل حالیت آتیٹی ہراتم مچ آ دنیا نا زرگزران سستی نا گواچی ئس ، حکومت پاکستان ناکنڈآن تعمیراتی صنعت ءِ ملنگا، دا گام آن تعمیراتی بشخ اتون گنڈوک بندغ آتا روزگار بحال مس و ملک اٹی زرگزرانی سرجز آک بنا کریر۔
آل پاکستان ماربل انڈسٹری ایسوسی ایشن نا چیئرمین نعمان باقی صدیقی حکومتی گام گیج آتا ستاءِ کرسا پارے کہ ساڑی مشکل حالیت آتیٹی دا گام آن نئے بیرہ تعمیراتی بشخ ءِ فائدہ مریک بلکن مچ آ زرگزران داڑآن فائدہ ہرفک۔
داڑے داہیت ذکر انا قابل ءِ کہ وزیر اعظم عمران خان ہائوسنگ ڈٹ آتا ہفتہ وار جاچ ءِ ہلنگ آن بیدس ہائوسنگ اسکیم تا تینٹ ہم چاری ءِ کننگ ءِ ساڑی ٹی وزیراعظم عمران خان نا کماشی ٹی راوی اربن ڈویلپمنٹ ڈٹ، سینٹرل بزنس ڈسٹرکٹ ڈٹ، والٹن ایئر پورٹ انا گدریفنگ و پنجاب نا چنکا شار تا چارمہ کنڈ الس ءِ اڑزآن ہنکین تننگ نا ڈٹ آتا بابت پیش رفت آ جاچ دیوان اس ہم اڈ ہلک۔ راوی شار انا ڈٹ اٹی کنسلٹنٹ آتون مذاکرات و ڈیزین نا بابت امور گڈیکو ریسہ غاتیٹی پترینگانے۔
صوبہ پنجاب نا چنکا شار تا چارمہ کنڈ وزیراعظم نا وژن نا رداٹ کم کٹیا کروک تپہ غاتے کم خڑچ انا اُراتا تفنگ نا سلاہ ئی ڈٹ آتیا ہم کاریم برجاءِ۔ کم خڑچ انا 3 آن 5 مرلہ اُراتا دا ڈٹ بناٹی صوبہ نا 25 آن 27 ضلع غاتا چارمہ کنڈ اٹی بناکننگک و اوکان پد اونا دنگ ءِ 87 چندی ہند آتسکان پدریسہ ودفنگک۔ حکومت پنجاب ڈغار تننگ تون اوار اوار بنائی ریسہ ٹی سرمایہ فراوان کیک و مون نا ریسہ ٹی مورگیج فنانسنگ نا رداٹ سبسڈی فراوان کننگک۔
پری فیبریکیٹڈ اُراتا بابت چندی جہانی کمپنیک ہم وزیراعظم عمران خان نا 50 لکھ اُراتا تفنگ نا وژن اٹی است خواہی نا درشانی ءِ کرینو۔
چین اناکمپنی ہنان ڈی آر کنسٹرکشن پڑک انڈسٹریل اسٹیٹ فیصل آباد اٹی تینااولیکو پری فیبریکیٹڈ اُراءِ تفینے۔ تدوک آ سال 18 ستمبر آ وزیراعظم عمران خان “ایزی فیبریکیٹڈ ہومز پرائیویٹ لمیٹڈ ڈٹ” انا بنداو ءِ تخاسس۔ وزیراعظم عمران خان تدوک آ سال بیجنگ نا دورہ ٹی ہنان ڈی آر کنسٹرکشن پڑک نا بھلا عہدیدار آتون اوڑدہی ٹی پاکستان اٹی ہند آتا خواست ءِ پورو کننگ کن پری فیبریکیٹڈ اُراتا تیاری کن زرکاری کننگ و ٹیکنالوجی ءِ منتقل کننگ نا فیصلہ کریسس۔دارداٹ چین اناکمپنی ہنان ڈی آر کنسٹرکشن پڑک خصوصی اقتصادی زون فیصل آباد اٹی پری فیبریکیٹڈ اُراتا پلانٹ اس جوڑ کرے، اوکان پدکمپنی ایزی فیبریکیٹڈ ہومز پرائیویٹ لمیٹڈڈٹ ءِ عملی دروشم اس تس و پوسکن آسال انا بنا تون تینا اولیکو پری فیبریکیٹڈ اُراءِ پورو کرینے۔
کوریا نا کمپنی جی۔ سونگو نا کنڈآن ہم پاکستان اٹی اولیکو فیبریکیٹڈ ہائوس پاک چائنہ فرینڈ شپ سینٹر اٹ تیار کننگا۔ کمپنی تدوک آ سال پاکستان اٹی تینا آپریشن تا بناءِ کرے۔ و 9 نومبر 2020ء آ پوسکن آ پاکستان ہائوسنگ ڈویلپمنٹ اتھارٹی نا چیئر مین لیفٹیننٹ جنرل (ر) انور حیدر کمپنی نا اولیکو فیبریکیٹڈ اُرانا بناءِ کرے۔ کمپنی نا کنڈآن تروک آ سرجم حوال آتا رداٹ کمپنی اِرا بیڈ روم تیا تالان دا اُراءِ ہفت دے اٹی تیار کرے۔ ایلو خاصیت آتون دا اُرانا لائف ٥٠ سال ءِ۔ دا اُرانا تیاری ٹی کاریم اٹ اتوک آ میٹیریل درآمد کروک ءُ۔ وخت اس کہ دا میٹیریل ءِ ملک انا تہٹی ہم تیار کننگ مریک۔ دا اُرانا تیاری ٹی انسولیشن والز آتے کاریم اٹ اتنگانے ہرا روایتی اُرانا مقابلہ ٹی 43 ہنداخہ گچین ءُ وخت اس کہ دا اُرا خاخر و زمی جمب آن ہم رکھوک ءِ۔جی سونگو کمپنی نا نمائندہ نا رداٹ جی سونگو چار مزلہ اُرا و اپارٹمنٹ تفنگ کیک۔ پوسکن آ ٹیکنالوجی نا گدریفنگ آن نئے بیرہ درملکی زرکاری بریک بلکن ٹیکنالوجی تخوک تعمیراتی و ملحقہ بشخ آتیٹی روزگار نا وارخواہی ودی کننگ اٹ کمک رسینگک۔ کمپنی سالانہ 18 ہزار اُرا و اپارٹمنٹ تیار کننگ نا لائخی تخک۔
حکومت نا گام گیج آتے مون آ درسا وزارت ہائوسنگ اینڈ ورکس ہم 109 ارب روپئی نا خڑچ آن پوسکن آ اپارٹمنٹ آتا تفنگ و سلوک آ اسکیم تا دوارہ بناءِ کرسا ملک اٹی کم کٹیا کروک بندغ آتا آسراتی کن چندی گام گیج کرینے۔ وزارت ہائوسنگ مسٹ آن پنچ مرلہ نا کم خڑچ انا ہائوسنگ یونٹ آتا تفنگ کن کم کٹیا کروک بندغ آتے سود آن پاک 5 ارب روپئی مالیت نا چندی اسکیم تا بناءِ کرے۔
وزارت ہائوسنگ اینڈورکس نا اسہ عہدیدار اس “اے پی پی” ءِ پارے کہ 5137 ہائوسنگ یونٹ پوروی نا جتا مرحلہ غاتیٹی ءُ۔ وزارت ہائوسنگ اینڈ ورکس گڑاس سلوک آ ڈٹ آتے بحال کرینے ہرافتے ٹی کری روڈ اسلام آباد، آئی 16 تھری اسلام آباد و آئی 12 ون اسلام آباد اوار ءُ۔ بھلو وخت اسے آن سلنگ نا گواچی داڈٹ آتیا کاریم نا بناءِ کننگا و پاکستان ہائوسنگ اتھارٹی(پی ایچ اے) نا کنڈآن اوفتے پورو کننگا، ولے آئی 16 تھری و آئی12 ون نا ڈٹ آتیا کاریم برجاءِ۔
بلوچستان اٹی کروک آگام گیج آتا بابت اوپارے کہ کچلاک روڈ کوئٹہ نا ڈٹ 1350 ہائوسنگ یونٹ آتیا تالان ءِ۔ داڈٹ اکن بلوچستان حکومت نا کنڈآن زمین تننگا۔ ممبر شپ ڈرائیو نا کمک اٹ 7700 آن زیات درخواست موصول مس و خودکار وڑوڈول اٹ سرسہب قرعہ اندازی نا انعقاد مس۔ خیبر پختونخوا ٹی پی قیچ اے ریذیڈینشیا سروزئی پروجیکٹ پشاور کن 8500 کنال زمین خیبر پختونخوا حکومت نا کنڈآن فراوان کننگا و اولیکو ریسہ ٹی پاکستان ہائوسنگ اتھارٹی فائونڈیشن 10 ہزار ہائوسنگ یونٹ یونٹ تفک۔ ڈٹ آتا بارواٹی اسٹیک ہولڈرز و الاٹی تےمعلومداری آن معلوم دار تخنگ کن وزارت ہائوسنگ اینڈ ورکس ناویب سائٹ آ غٹ ڈٹ و اسکیم تا بارواٹی ہروڑنا معلومداری دستیاب ءِ۔ پی ایچ اے و فیڈرل گورنمنٹ ایمپلائز ہائوسنگ اتھارٹی نا تینا فیس بک وٹویٹر اکانٹ ءُ۔ ہرافتیا ڈٹ و گام گیج آتا معلومداری فراوان کننگک۔ داکان بیدس ڈٹ آتا بارواٹی اخبار، سیمینار و میڈیا ناکمک اٹ تشہیر ہم کننگک۔
تعمیراتی بشخ ءِ سہی کنڈآ دننگ و زرگزران نا بحالی کن حکومت نا کنڈآن آسراتی پیکج نا وخت آ گام آن نئے بیرہ تعمیراتی بشخ اٹی ترند رفتاری شونداری پک مریک بلکن روزگار نا وارخواہی ہم ودی مریک۔ زرگزرانی و تعمیراتی چاہندار تا رداٹ تعمیراتی بشخ اٹی اگہ ہندا رفتار اٹ کاریم برجا سلیس تو 50 لکھ اُراتا تفنگ ناہدف آسانی اٹ دوئی مننگ نا پکا ءُ اومیت اسے۔
