اسلام آباد۔8فروری (اے پی پی): مزن وزیر عمران خان ءَ وزارت ءِ موسمی مٹ ءُ بدلی ءِ کار کرد ءَ را ساڑات ءُ پنت ءُ شون کت کہ پاکستان ءَ ایٹماسپیئر ءِ ھراب کنوکیں گیش آنی تہ ءَ کمی آرگ ءِ واستہ گامگیج کنگ بہ بیت، 10 بلین ٹری سونامی پروگرام ءَ ساپ ءُ سلہ ایں دل یکیمی جوڑ کنان ءَ منصوبگ ءِ سر ءَ پد ءُ رند ءَ سپارکو ءَ چہ سیٹلائٹ ءِ وسیلگ ءَ ھم کمک در جنگ بہ بیت۔ آ دو شمبے ءَ مزن وزیر ءِ کمیٹی برائے موسمی مٹ ءُ بدلی ءِ دیوان ءَ سروکی ءَ کنگ ءَ ات۔ دیوان ءَ وزیر ءِ درئی کار شاہ محمود قریشی ، بنجاھی وزیر منصوبگ بندی اسد عمر، بنجاھی وزیر ھاٹیگ عمر ایوب، بنجاھی وزیر آپی آسراتی فیصل واوڈا، سر وزیر پنجاپ سردار عثمان بزدار، سرو زیر خیبر پختونخوا محمود خان، سرو زیر بلوچستان جام کمال خان ، مزن وزیر ءِ ھاسیؐ کمکار ملک امین اسم، وزیر ءِ مملکت زرتاج گل، مزن وزیر ءِ ھاسیں کمکار ڈاکٹر معید یوسف ءُ کلانہ ایں کارندہ آں شرکت کت۔ دیوان ءَ گرین ہائوس گیز آنی تاجگیں جاور ھال ءُ 10 ارب درچک کشگ ءِ پروگرام ءِ ھوالگ ءَ دیمروئی گامگیج آنی سر ءَ چار ءُ تپاسی گپت۔ دیوان ءَ را گوشگ بوت کہ پاکستان ءَ گرین ہائوس گیس آنی یلو بوھگ ءِ تہ ءَ گیشی ءِ کساس ھمروچگیں رنگ ءَ جھلی تک ءَ چہ 9 درسد کم انت وھدیکہ اے کساس راجی تک ءَ گیشینتگیں ھد ءُ ابیل آں چہ جھل تر انت۔ ایش ایٹماسپئر دوست مٹ ءُ بدلی خیبر پختونخوا ءَ بلین ٹری سونامی ءِ کامیاتیں منصوبگ ءُ سرجمیں ملک ءَ 10 ارب درچک کشگ ءِ سونامی پروگرام ءِ بدولت ءَ رستگ۔ مزن وزیر ءَ 10 ارب درچک ءِ سونامی پروگرام ءِ ھوالگ ءَ دیمروئی کار آنی سر ءَ دل یکیمی درشان کنان ءَ پنت ءُ شون کت کہ اے پروگرام ءَ ساپ ءُ سلہ ایں دل یکیمی کنگ بہ بیت ءُ سرجمیں ملک ءَ اے پروگرام ءِ پد ءُ رند کنان ءَ سپارکو ءَ چہ سٹیلائٹ اکس آنی در جنگ ءَ چہ کمک زورگ بہ بیت۔
