اسلام آباد۔ 08 فروری (اے پی پی) وزیراعظم عمران خان پارینے کہ ساڑی حکومت نا اولیت لس بندغ نا فائدہ ءِ۔ مشکل زرگزرانی حالیت آتا سوب آن نیزگار الس غٹ آن زیات زہمی مننگ ءُ، اوفتے ہروڑنا ریلیف تننگ ءِ حکومت اولیت ایتک۔ داخیال آتا درشانی ءِ او دوشنبے نادے آ تینا کماشی ٹی حکومتی زرگزرانی ٹیم انا دیوان آن تران کرسا کرے۔ دیوان اٹی بنداوی المی آ گڑاتا نہاد آتیٹی کمتی اتنگ و لس بندغ ءِ ریلیف تننگ نا بابت گام گیج آتیا سجفنگا۔ دیوان اٹی بنجائی وزیر ڈاکٹر عبدالحفیظ شیخ، اسد عمر، مخدوم خسروبختیار، سلاہکار عبدالرزاق داؤد، ڈاکٹر عشرت حسین، گورنر اسٹیٹ بینک ڈاکٹر رضاباقر، خصوصی کمکار ڈاکٹر وقار مسعود، ندیم بابر، تابش گوہر و سینئر آفیسر آک بشخ ہلکر۔ دیوان اٹی احساس پروگرام نا رداٹ حقدار خاہوت آتے ٹارگٹڈ سبسڈی نا فراوانی نا بابت چندی سلاہ تیا ہم سجفنگا۔ وزیراعظم عمران خان دیوان آن تران کرسا پارے کہ ساڑی حکومت نا اولیت لس بندغ نا فائدہ ءِ۔ اوپارے کہ مشکل زرگزرانی حالیت آتا سوب آن نیزگار الس غٹ آن زیات زہمی مننگ ءُ ہنداخاطرآن اوفتے ہروڑنا ریلیف تننگ ءِ حکومت اولیت ایتک۔ وزیراعظم پارے کہ بالواسطہ خراج آتا بھاریم غٹ آن زیات نیزگار تپہ غاتیا تمک ہنداخاطرآن بالواسطہ خراج آتا بھاریم ءِ کم کننگ آ خصوصی چکار کننگے۔ وزیراعظم زرگزرانی ٹیم ءِ پارت کرے کہ درآمد مروک کُن و خور انا چندی گڑاتیا خلوک خراج آتیٹی ہم کمتی نا بابت ہم سلاہ پیش کننگے تانکہ الس خاص کر غریب و مڈل کلاس ءِ ریلیف فراوان کننگ مرے۔
