اسلام آباد۔ 08 فروری (اے پی پی) وزیر خارجہ مخدوم شاہ محمود قریشی پارینے کہ ڈی جی آئی ایس پی آر نا بیان آئین و کانود نا رداٹ ءِ، گڑاس پیشن نا واکدار اوغانستان نا گل زمین ءِ کاریم اٹ اتسا پاکستان اٹ دہشت گردی نا پشت پناہی کننگ ءُ۔ دوشنبے نادے آ پی ڈی ایم نا برانزی سیاست نا بابت اہم بیان اٹی وزیر خارجہ پارے کہ ڈی جی آئی ایس پی آر نا بیان آئین و کانود نا رداٹ ءِ، او پیدوار کرینے کہ پاک فوج تینا آئینی کڑد ءِ ادا کننگ ءِ، او راست پاننگ ءِ کہ اونا زمواری تیٹی بھاز ودکی مسنے۔اوپارے کہ 14 نومبر 2020ء آ نن دنیا نا مون آ ہراڈوزیئر ءِ تخان اوٹی دا واکدار آتا بابت ناقابل تردید شاہدی ساڑی ءِ ہرا پاکستان ءِنزور کننگ خوارہ، گڑاس پیشن نا واکدار ہندن ءُ ہرااوغانستان نا گل زمین ءِ کاریم اٹ اتسا پاکستان اٹ دہشت گردی نا پشت پناہی ءِ کننگ ءُ۔ وزیر خارجہ پارے کہ اقوام متحدہ مانیٹرنگ ٹیم انا رپورٹ پاکستان نا موقف نا تائید ءِ کرینے، ای یو ڈس انفولیب انا ساڑی آ رپورٹ ہندوستان ءِ پورووڑاٹ بے نقاب کرینے۔ اوغان امن عمل اسہ نازرک ءُ ریسہ سے ٹی پترینگانے۔ وخت اس کہ دے ٹکی سیم آ وار وار لائن آف کنٹرول ناخلاف ورزی مننگ ءِ، ننا پوسٹ آتے ، ورناتے و لس شاری تے شست کننگک، داوخت آ بھارت نا اصلی دروشم دنیا نا مون آ بسنے، ہراواکدارک داحالیت آتیٹی ملک اٹی بے چیٹی تالان کننگ ءُ اوفک پاکستان نا فائدہ غاتا رکھ ءِ کپننگ ءُ۔ وزیر خارجہ پارے کہ مظفر آباد اٹی سلسا جلسہ غاتیٹی داپاننگ کہ کشمیر نا سوداءِ کننگانے، دااخہ غیر زموارانہ ءُ گپ وتران اسے۔ پاکستان اٹ بے چیٹی تالان کننگ نا فائدہ بھارت ءِ مریک۔ پی ڈی ایم پاکستان نا فائدہ غاتے مون آ تخے۔ اوپارے کہ نن اسپیکر نا کماشی ٹی پی ڈی ایم تون کیہی اوڑدہی کرین، اپوزیشن رزاک اٹ ادارہ و شخصیت آتے متنازع کننگ خواہک، اگہ اپوزیشن تون شاہدی ارے تو اوفتے مون آ اتے۔ بیرہ قیاس آرائی نا بنداو آ ادارہ غاتا تضحیک پاکستان نا بیانیہ و ملکی فائدہ غاتے نسخان تننگ آنبار ءِ۔
