اسلام آباد۔5فروری (اے پی پی): وزیر ءِ درئی کار شاہ محمود قریشی ءَ گوشت کہ ھمک سال 5 فروری ءَ ، ما مقبوضہ جموں کشمیر ءَ کشمیری الس آنی گوما یکوئی ءِ درشان ءَ کناں۔ سرجمیں پاکستانی راج، وت واجئی ھک ءِ جائزیں ھک ءِ در جنگ ءِ واستہ جہد ءُ کوشست ءَ کشمیری الس آنی گوما ھمکوپگ ءَ اوشتاتگ آں۔ آدینگ ءِ روچ ءَ کشمیر ءَ گوں یکوئی ءِ موہ ءَ وزیر ءِ درئی کار ءَ یک کلوہے اندر ءَ گوشت کہ گوستگیں 18 ماہ ءَ چہ مقبوضہ کشمیر ءَ یک شل ءَ بھارتی چپ ءُ چاگرد ءَ انت، سرجمیں ناکہ بندی ءَ چہ کشمیری الس وتی گس آنی اندر ءَ کیز انت، ءُ میڈیا ءِ سر ءَ ترندیں بندش آنی گوما دیم پہ دیمی کنگ ءَ انت۔ توامیں سیاسی سروک آناں کیز ءِ توک ءَ ایر کنگ بوتگ۔ دم تسینوکیں اردئی چپ ءُ چاگرد ءُ کوویڈ 19 ھوپ ءُ نادراھی ءَ ابید، بھارتی ارد آں گس آنی اندر ءَ تلاشی ءُ دروگیں “مقابلہ” آنی رد ءَ جاڑی داشتگ۔ ناشرکار “ہندوتوا” لیکہ ءَ چہ پد ، آر ایس ایس- بی جے پی حکومت جیڈھ دمگ ءَ دمگ ءِ کوھنیں راج ءَ را مٹ کنگ ءُ کشمیری آنی پجار ءَ را ھلاس کنگ لوٹ ایت۔ نوکیں گس ءُ ماڑی آنی کانود آں ابید، اردو زبان ءِ سرکاری بستار ءَ را مٹ کنگ ءِ کانود اے جزم ءِ گامگیج آنی بھر انت۔
