اسلام آباد۔ 04 فروری (اے پی پی) وزیر خارجہ شاہ محمود قریشی پارینے کہ 26 می آئینی ترمیم نا کمک اٹ نن اوپن بیلٹنگ نا کمک اٹ سینیٹ نا گچین کاری تے شفاف کننگ خوانہ تانکہ ہلنگ و بہا کننگ نا کمک اٹ آخبت داوڑنا مخلوق نا گچین کاری کننگپ ہرا بیرہ تینا تجوری تے پُرکیرہ۔ ننتون اِرا تہائی گیشتری اف ولے نن اپوزیشن ءِ بے نقاب کرینن، آئینی ترمیم منظور کرفنگ کین یا کرفنگ کتون نن تینا مقدمہ ءِ الس نا عدالت اٹ پیش کرینن،نن الس تون وعدہ کریسن کہ نن گچین کاری اصلاحات نا کمک اٹ شفافیت اتینہ، نن تینا اصولی موقف آ سلوک اُن و ننا سمت درست ءِ۔ اپوزیشن جمہوریت ءِ پٹڑی آن دڑفنگ خواہک۔ الس چاہک کہ دا نظام جمہوریت و آئین ءِ دیر اس لتاڑنگ ءِ۔ نن خوانہ کہ پیشن نا ملک اٹی پاکستانی تے وونٹ انا حق تننگے و اوفتیکن درگہ غاتے ملنگے۔ پیشن نا ملک اٹی پاکستانیک ہم خنر کہ اپوزیشن اوفتا فائدہ غاتیکن انت کڑد ادا کننگ ءِ۔ پنچ شنبے نادے آ قومی اسمبلی ٹی 26 می آئینی ترمیم آ شرہ ءِ برجاتخسا وزیر خارجہ شاہ محمود قریشی پارے کہ قوم اوفتیا ہُننگ ءِ کہ ہراوڑ اوفک گرگٹ آنبار رنگ ءِ بدل کرینو۔ دا ہلنگ و بہاکننگ نا عادتی ءُ۔ عمران خان وعدہ کریسس کہ نن اصلاحات کرسا شفافیت اتینہ۔ دا اسٹ سینیٹ نا ہیت اف مستین اٹ سینیٹ نا کیہی گچین کاریک گدرینگانو ہرافتے ٹی ہلنگ و بہاکننگ نا کمک اٹ داوڑنامخلوق سینیٹر گچین مسرہ ہرافتا نئے نظریہ اس ئس نئے جماعت اس، تحریک انصاف آئینی اصلاحات نا کمک اٹ مون آ ہِننگ خواہک۔ پارلیمںٹ اسہ مقدس ءُ ادارہ اسے۔ اپوزیشن نا رویہ دا تقدس ءِ پامال کننگ ءِ۔ وزیر خارجہ پارے کہ داقوم انا مون آ بے نقاب مسنو۔ نن سینیٹ اٹی ہموفتا گچین کاری ءِ خوانہ ہرافک بنجاپاکستان نا دفاع ءِ کننگ کیر۔ ہلنگ و بہاکننگ نا کمک اٹ سینیٹر گچین مروک آک تینا تجوری تے پُرکیرہ، نن داحالیت آتا چٹفنگ کن بل اس ایسونن۔ دابل ءِ نن تینا گرج اسے نا رداٹ پیش کتنون۔ مستین اٹ ہرافک تینا ضمیر ءِ سوداکریر و تینا نہاد ءِ خلفیر تحریک انصاف داوڑنا 20 مخلوق نا برخلاف کارروائی کرے۔ اوپارے کہ میثاق جمہوریت نا شق 23 آن ہم دا غافل مسنو۔ سینیٹ اٹی نن اقلیت اٹی ئسن۔ مسلم لیگ (ن) و جے یو آئی (ف) سینیٹ اٹی شرہ ٹی خواست کریسر کہ او سینیٹ نا شفاف گیچن کاری خوارہ۔ اوپارے کہ ننا حکومت تون اِراکسر ئسر۔ اسٹ داکہ نن بوسیدہ نظام ءِ چٹفن، نن سپریم کورٹ ءِ اسہ مقدم ءِ ادارہ اس تکسا دا بابت ریفرنس دائر کرینن کہ جج آک پار کہ انت سینیٹ اٹی اوپن بیلٹنگ مننگ کیک۔ ہموڑے دا ویل سماعت اٹی ءِ۔ گمان ءِ کہ عدلیہ راہشونی کیک۔ اوپارے کہ ارٹ میکو کسر دائس کہ اِرا تہائی گیشتری نا کمک اٹ دا آئینی ترمیم ءِ منظور کرفنگے۔ نن تون اِراتہائی گیشتری الوکہ، ننا مسخت اوفتے بے نقاب کننگ ئس، قوم اوفتا چہرہ ءِ خنانے۔ اوپارے کہ اللہ نا عدالت آن پد الس نا عدالت ءِ، نن تینا مقدمہ ءِ الس نا عدالت اٹی پیش کرینن۔
