اسلام آباد۔ 04 فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ سیل و سوات نا مون آ دننگ وزیراعظم عمران خان نا اولیت آتیٹی اوار ءِ، بدبختی اٹ مستین اٹ دا بشخ ءِ گوجالنگا۔ پاکستان پرامن ءُ ملک اسے، ننا قطبی علاقہ غاتون اوار مچ آ ملک انا سیل و سواتی ہند آک مچ آ دنیا نا سیل و سواتی تا مہمانداری کن تیار ءُ۔ او پنچ شنبےنا دے آ اسلام آباد ٹوررزم فیسٹیول نا لانچنگ دود آن تران کریکہ۔ بنجائی وزیر سینیٹر شبلی فراز پارے کہ داڑے شریک مرسا حقی خوشی محسوس کننگ اُٹ، دااسہ ہندن ءُ گام اسے ہراڑآن کیہی بشخ آک فائدہ ہرفرہ، ملک اٹی سیل و سوات نا بشخ پورو وڑاٹ بحال مسنے۔ اوپارے کہ بنداوی وڑاٹ وزیراعظم عمران خان سیل وسوات نا بشخ ءِ ہرااہمیت تسنے مستین اٹ اونا درور ملیپک، اونا است انا خواہش و کوشست ءِ کہ ننا ملک اٹ سیل و سوات و اوڑتون گنڈوک سرجزآک ترندمریر۔ اوپارے کہ دنیا ٹی سیل و سوات آن گچین ہچ ءُ سفارتکاری اس اف۔ ننا ملک اٹی زیباءُ ہند ارے ہرافتا سیل و سوات دہشت گردی نا ریسہ نا سوب آن زہمی مسوسس ولے ننا سلہہ بند فوج، سیکورٹی فورس و الس نا قربانی تیان ملک اٹی دُوارہ امن مسنے۔
