راولپنڈی۔ 04 فروری (اے پی پی) بنجائی وزیر داخلہ شیخ رشید احمد پارے کہ جمہوریت ءِ طاقت مدام ڈائیلاگ آن ملک، ڈائیلاگ نا ارٹ میکو پن جمہوریت ءِ، وزیراعظم عمران خان اقوام متحدہ تون اوار مچ آ دنیا ٹی کشمیر نا مقدمہ تون بے مٹ وڑاٹ مون تس۔ استیفہ غاتا دھڑکو تروک آک تینا فیصلہ غاتیا نظرثانی کیر، استیفہ غاتیان ہچ ءُ قیامت اس بفک ولے جمہوریت و جمہوری نظام اٹ بے چینی ضرور تالان مریک۔ داخیال آتا درشانی ءِ او بنجائی وزیر داخلہ گورنمنٹ وقار النساء پوسٹ گریجویٹ کالج زالبول اٹی یوم کشمیر نا بابت اڈ ہلوک آ دود آن تران و اوکان پد میڈیا تون گپ وتران کرسا کرے۔ شیخ رشید احمد پارے کہ پی ڈی ایم انت کہ فیصلہ اس کیک، اونا ورندی ءِ جمعہ آ لال حویلی نا پیشن بطور وزیر داکلہ ایتیوہ، لال حویلی نا لال چوک اتون بھلو رشتہ اسے، لال چوک و سری نگر نا ہوٹل آتیٹی اینو ہم شیخ رشید نا عکس آک لگوک ءُ، ننا آجوئی نا ہر سال کشمیر نا جہد آجوئی تون گنڈوک ءِ۔ اسہ سوج اسے نا ورندی ٹی بنجائی وزیر داخلہ شیخ رشید احمد پارے کہ بزغر آتا برانز اٹی پاکستان نا اوار مننگ نا دوبہ خلوک آ بھارت چائےکہ پاکستان اسُل داوڑنا چال چلیفپک، ولے دا طے ءِ کہ وفاکرورے تو وفا کینہ۔ جفاکرورے تو جفا کینہ و اگہ ستم کرورے تو ستم کینہ۔
