کشمری آنی بے دروریں  آجوئی کامیاتی ءَ گوں نزیک بیت،  بھارتی زوراکی ءُ بنی آدم آنی ھک آنی ھلاپ  کنگ ءِ دست مانجنی  دگنیا ءِ دیم ءَ  سہرا بوتگ انت، حکومتی ءُ اپوزیشن  ءِ باسک پارلیمنٹ  ءِ    کشمیر ءَ گوں یکوئی ءِ  روچ  ءِ  ھوالگ ءَ اے پی پی ءَ گوں تران  

اسلام آباد۔4فروری  (اے پی پی):حکومت ءُ اپوزیشن ءَ  گوں سیادی داروکیں پارلیمنٹ ءِ باسک آں کشمیری آنی  جائزیں ھک  ءُ وت واجئی ءِ در جنگ ءِ جہد ءُ کوشست  ءِ کمک ءِ  جزم ءِ درشان کنان ءَ گوشت  کہ کشمیری آنی بے دروریں جہد ءُ کوشست کامیاتی ءَ گوں زوت نزیک بیت۔ بھارتی ظلم ءُ  بنی آدم آنی  لگت مالک دگنیا ءِ دیم ءَ سہرا بوتگ۔ پارلیمانی سیکرٹری برائے ریلویز فرح حبیب ءَ  کشمیر آں گوں یکوئی ءِ ھوالگ ءَ اے پی  پی ءَ گوں تران کنان ءَ گوشت کہ  بھارت ءَ 80 لکھ کشمیر آناں  بندی جوڑ کتگ۔ بھارتی ءِ   ناشرکاریں ہندو سروک نریندر امودی ءَ بھارت ءِ    آوار جتگیں جتگیں  جموں کشمیر ءِ جیڈھ  ءِ ارزشت ءَ را  ھلاس کنگ ءِ کوشست کتگ۔  ایش لائک ءِ مذمت انت،

  آئی ءَ گوشت کہ آواناں وت واجئی ھک دیگ  بہ بیت تانکہ  آ وتی آیوکیں باندات ءِ پیسلہ ءَ وت کت بکن انت۔  آئی ءَ گوشت کہ کشمیر پاکستان ءِ مھکمیں  ریشگ انت۔ مزن وزیر عمران خان ءَ سرجمیں دگنیا ءِ دیم ءَ مودی  ءِ فاسٹ لکا، آر ایس ایس ءُ ہندو توا ءِ لیکہ ءَ را سہرا کتگ۔ فرخ حبیب ءَ گوشت کہ کشمیری آنی ایمنی ءِ جہد ءُ کوشست   ءَ را ھمک فورم ءِ سر ءَ جاڑی  دار آں۔ 5 فروری ءَ کشمیر برات آنی گوما  گیشاں چہ گیش یکوئی  ءِ درشان ءَ کناں۔

پاکستان تحریک انصاف ءِ باسک راجی اسمبلی احمد حسین ڈیہڑ ءَ گوشت کہ ما کشمیری برات آنی گوما ھمکوپگ اوشتاتگ آں۔ مزن وزیر عمران خان  ءَ کشمیر ءِ جیڈھ ءَ را یونائیٹڈ نیشن ءَ  جوانیں رنگ ءَ سہرا کتگ۔ کشمیری برات آنی قربانی لائک توسیپی انت۔

 بلوچستان  السی پارٹی ءِ سینیٹر انوار الحق کاکٹر ءَ  کشمیر ءَ گوں یکوئی  درشان   کنگ ءِ ھوالگ ءَ تران کنان ءَ گوشت کہ کشمیر  سرجمیں مسلمان آنی جیڈھ انت۔ اے جیڈھ یونائیٹڈ نیشن ءِ منوگر آنی رد ءَ گیوار کنگ بہ بیت۔ سرجمیں راج 5  فروری ءَ کشمیری آنی گوما یکوئی کنگ ءَ انت۔  ایشی ءِ مول ءُ مراد میاں اوستمانی پڑ ءَ کشمیر ءِ  جیڈھ ءَ را سہرا  ءُ بھارتی ظلم آناں سہرا کنگ انت۔

مسلم لیگ (ن) ءِ سینیٹر رانا مقبول ءَ گوشت کہ  کشمیر ءِ جیڈھ آنی گیواری ءِ واستہ سفارتی رسانک در  آناں  کارمرد کنگ لوٹ ایت۔    پاکستان پیپلز پارٹی ءَ گوں سیادی داروکیں  سینیٹر سسی پلیجو ءَ گوشت کہ کشمیر ءَ بھارتی ظلم،  لگت مالی ، پندل ساچی ءَ را مذمت  کنت انت،   اکھنڈ بھارت ءِ واب  پروشیت ءُ ڈگار ءَ کپ ایت۔ آئیءَ  گوشت کہ بھارت  ءَ مقبوضہ کشمیر ءَ  چپ ءُ چاگرد کنگ ءَ انت  ایشی ءِ بابت ءَ سرجمیں دگنیا ءَ را زانت ءُ سرپد انت۔  پاکستان پیپلز پارٹی  ءَ ھوار سرجمیں راج ءِ بن گپ کشمیر ءِ جیڈھ ءِ بابت ءَ  ھم کچ انت۔ کشمیر ءَ بھارت ءِ  زوراکی ڈگار ءَ کپتگ۔ مارا بھارت ءَ را سہرا کنگ ءِ واستہ لابنگ ترند کنگ لوٹ ایت۔ آ  روچ دور نہ انت وھد ءِ کشمیری آزات بنت۔

 ایشی ءَ ابید اسپیکر راجی اسمبلی اسد قیصر ءَ پارلیمنٹ گس ءَ  کشمیر ءَ گوں یکوئی ءِ ھوالگ ءَ  اکشی نماش  ءِ ھم بنگیج کت۔ ایشی ءِ موہل ءُ مراد مقبوضہ کشمیر ءَ بھارتی ظلم ءُ زوراکی آناں سہرا کنگ انت۔

آئی ءَ گوشت کہ اے گپ لائک ءِ توسیپی انت کہ  کشمیر ءِ  جیڈھ  ءِ سر ءَ سرجمیں ملک ءِ توامیں سیاسی گل سیاسی   بُکگ آناں یک نیمگ ءِ دور دیان ءَ  یک مشت  انت۔  مزن وزیر عمران خان ءَ یونائیٹڈ نیشن ءَ  میاں اوستمانی فورم آں ھوار کشمیر ءِ جیڈھ ءَ را جوانیں رنگ ءَ سہرا کتگ۔  حکومت ءِ جوانیں کوشست آنی سبب ءَ میاں اوستمانی میڈیا ءِ دلگوش اے جیڈھ ءِ سر ءَ  پر بوتگ۔ سرجمیں دگنیا بھارتی زوراکی ءِ ھلاپ ءَ گوانک چست کنگ ءَ انت۔  آئی ءَ گوشت کہ بھارت مقبوضہ کشمیر ءَ بنی آدمی ھک آنی  لگت مالی ءَ گوں دست مانجن انت۔  انٹرنیٹ ءُ  آزاتی ءَ گوں  وتی لیکہ ءِ درشان ءِ سر ءَ بندش ءَ چہ   زالبول آنی  گوما ریپ بوھگ ءَ انت۔ سرجمیں دگنیا ءَ  اے وھد ءَ بھارتی ظلم سہرا بوھگ ءَ انت۔ میاں اوستمانی برات آناں کشمیر ءِ جیڈھ ءِ گیواری ءِ واستہ جوانیں کرد  پیلو کنگ ءِ ضلورت انت۔