اسلام آباد۔ 03 فروری (اے پی پی)بنجائی وزیر منشیات تور بریگیڈیئر (ر) اعجاز احمد شاہ تون سعودی ڈرگ لائزن آفیسر(ڈی ایل او) فیصل البوگامی اوڑدہی کرے۔ وزارت منشیات تور نا کنڈآن جاری بیان نا رداٹ اوڑدہی ٹی تین پہ تینی است خواہی نا امور آ گپ وتران مس۔ داوخت آ گپ وتران کرسا بنجائی وزیر اعجاز احمد شاہ پارے کہ منشیات فروش و اسمگلنگ کروک آتا برخلاف سخت کارروائی مرے۔ اوپارے کہ منشیات تروک آک اصل ڈوہدار ءُ۔ منشیات نا گواچی بندغ آتا بحالی کن گچین گام گیج کننگ انگ ءِ۔ اوپارے کہ منشیات فروش آتا برخلاف پٹ وپولی عمل و کارروائی ٹی اے این ایف فورس سعودی کمامدارآتون اواری اٹ کاریم کیک۔ بنجائی وزیر پارے کہ ننے اواری اٹ منشیات نا چٹفنگ کن کاریم کروئی مریک۔ اعجاز احمد شاہ پارے کہ پاکستان و سعودی عرب اِرا جون اسہ جان ءُ، ہڑتوم آ ملک آتیان منشیات نا چٹفنگ دیرینہ است خواہی ءِ۔ اسٹ مرسا منشیات آن پاک راج ٹہیفنگ مریک۔ اوپارے کہ کارروائی و ایلو باندات نا بابت المی سرجم ہڑتوم آ ملک آتا نیام اٹ بایدے شیئرمرے۔ داڑآن گچین حکمت عملی و لائحہ عمل مرتب کننگ اٹ کمک رسینگک۔ داوخت آ سعودی ڈی ایل او فیصل البوگامی پارے کہ غٹ ادارہ غاتا اواری اٹ کاریم کننگ منشیات نا چٹفنگ کن المی ءِ۔
