اسلام آباد۔ 03 فروری (اے پی پی) الیکشن کمیشن 11 فروری آ سینیٹ نا مارچ اٹی خورک مروک آ نشست آتیا گیچن کاری کن شیڈول جاری کننگ نا پڑو کرینے۔ الیکشن کمیشن آف پاکستان آن جاری اعلامیہ نا رداٹ ای سی پی تینا آئینی زمواری ءِ پورو کرسا سینیٹ گچین کاری 2021کن گچین کاری پروگرام ءِ 11 فروری 2021 آ جاری کیک۔ دا رداٹ غٹ گمانی اومیتدار آتا آسراتی تا رداٹ پندار کاغد آتا فراوانی نا بناءِ اینو آن کننگانے۔ بنجائی دارالحکومت نا اِرا نشست آتیکن پندار کاغد الیکشن کمیشن پاکستان سیکرٹریٹ جی فائیو ٹو شاہراہ دستور اسلام آباد آن وصول کننگ مریک۔ وخت اس کہ صوبہ غاتا نشست آتیکن تعلقدار صوبائی الیکشن کمشنر نا دفتر آتیان پندارکاغد آتے ہلنگ مریک، ہرافتا ڈس صوبائی الیکشن کمشنر پنجاب لاہور آفس 10 کورٹ اسٹریٹ لاہور، صوبائی الیکشن کمشنر سندھ کراچی آفس بلاک نمبر اے 444 شاہراہ عراق صدر کراچی، صوبائی الیکشن کمشنر خیبرپختونخوا پشاور آفس پشاور گالف کلب گیٹ نمبر 2 شامی روڈ پشاور کینٹ و صوبائی الیکشن کمشنر بلوچستان کوئٹہ آفس برگزہ ویلاز اسٹریٹ نمبر 1 نزد زرغون روڈ کوئٹہ ءِ۔ غٹ سیاسی جماعت و اومیتدار آتے یات دہانی کرفنگک کہ پندار کاغد آتے جمع کرفنگ نا وخت آ پارٹی ٹکٹ ءِ خلیر ولے آزاد حیثت اٹ بشخ ہلوک آ اومیتدار پارٹی ٹکٹ منسک کننگ آن ممبراءُ۔ داکان بیدس اومیتدار آتے داہیت انا یات دہانی کرفنگک کہ او تینا گچین کاری خڑچ آتا کننگ نا بابت شیڈول بینک انا برانچ اسے ٹی دا مسخت کن خاص اکاؤنٹ اسے نا بناءِ کیر انتئے کہ اونا اکاؤنٹ نمبر ءِ پندارکاغد آتیٹی درج کننگ المی ءِ۔ ہنداخاطرآن دابابت مہالو آن تیاری کننگے۔ کانود نا رداٹ اومیتدار کن المی ءِ کہ او تینا گیچن کاری خڑچ آتے دا مخصوص بینک اکاؤنٹ آن بیدس پین بینک اکاؤنٹ اسے آن کننگ نا مجاز افس۔ اسہ اومیتدار کن گچین کاری خڑچ آرتا حد 15 لکھ روپئی مقرر ءِ ہنداخاطرآن بینک اکاؤنٹ ءِ ملنگ نا وخت آ15 لکھ آن زیات زر بینک اکاؤنٹ اٹ تخنگپ۔
