اسلام آباد۔ 03 فروری (اے پی پی) اسپیکر قومی اسمبلی اسد قیصر پارینے کہ مقبوضہ کشمیر اٹی بھارتی ظلم انسانی المیہ نا دروشم اس اختیار کرینے، کشمیر نا ویل ءِ ایسر کننگ آن بیدس سویلی ایشیاٹی امن مننگ کپک، اقوام متحدہ تینا قرارداد آتیا عمل کرفے، کشمیر نا ویل ءِ دنیا نا ہرفورم آ ہرفنہ۔ چارشنبے نادے آ داڑے قومی کشمیر کانفرنس آن تران کرسا اوپارے کہ بھارت کشمیری تا بنداوی حق ءِ خلکونے۔ وزیراعظم عمران خان اقوام متحدہ نا فورم آ کشمیر ناویل ءِ پبی وڑاٹ ہرفینے۔ اوپارے کہ کورونا نا دین آن مست کشمیر نا ویل آ جوان ءُ پلان اس جوڑ کننگا۔ کشمیری الس نا مقدمہ ءِ مچ آ دنیا نا پارلیمان تیٹی ہرفنہ۔ تینا پارلیمانی ڈل آتے کشمیر نا ویل آ مچ آ دنیا ٹی گدریفینہ۔ جہانی کہول انا کشمیر نا ویل دیوان اس بٹنگنہ۔ کشمیر پاکستان نا شہ رگ ءِ۔ کشمیر نا ویل سیاست آن ایڑتر ءِ، دا ننا قومی ویل اسے۔ کشمیری الس آ بھارتی بیدادی نا مذمت ءِ کیوہ۔ انسانی حق انا تنظیمک کشمیر اٹی برجاانسانی حق انا شدید ترین پامالی تیا نوٹس ہلیر۔ نن تینا مظلوم کشمیری ایلم تتون ہم کوپہ سلوک اُن۔ انشاء اللہ کشمیری الس سرسہبی اٹ ہمکنارمریک۔ اسپیکر قومی اسمبلی پارے کہ کشمیر نا ویل پاکستان و انسانیت نا ویل ءِ۔ کشمیر نا ویل سیاست آن ایڑتر ءِ۔ اسد قیصر پارے کہ 5 فروری نا بابت قومی اسمبلی ٹی قرارداد اتینہ۔ آرٹیکل 370 نا چٹفنگ بھارت نا تینا جمہوری تاریخ آن مون ہڑسنگ ءِ۔ کشمیر آ قومی اسمبلی آن امنائی قرارداد پاس کننگک۔ او آئی سی نا دیوان ءِ پاکستان اٹی بٹنگ انگ آ کاریم کننگ اُن۔ پارلیمانی تنظیمک جہانی کہول آ کشمیر نا ویل ءِ تالان کننگ کن کڑدادا کیر۔
