اسلام آباد۔ 03 فروری (اے پی پی) بنجائی وزیر ڈٹ بندی شونداری و اصلاحات و خصوصی گام گیج اسد عمر پارینے کہ کورونا ویکسی نیشن پروگرام نا بناءِ کننگانے، حکومت الس نا کمک اٹ کورونا دین انا مون ءِ تورے۔ داخیال آتا درشانی ءِ او چارشنبے نادے آ نیشنل کمانڈ اینڈ آپریشن سینٹر اٹی کورونا ویکسینیشن پروگرام نا بناءِ کننگ نا وخت آ میڈیا تون گپ وتران کرسا کرے۔ بنجائی وزیر اسد عمر پارے کہ مچ آ پاکستان اٹی کورونا دین انا ویکسین خلنگ نا عمل نا باقاعدہ بناءِ کننگانے۔ الس نا کمک و حکومت نا گچین کوشست آتیان کورونا نا مون ءِ تورینن وخت اس کہ ملک آ مشکل وخت بسوسس ہرانا نن غٹ اواری اٹ مقابلہ ءِ کرین و کورونا نا حالیت آتیٹی پاکستان نا حکمت عملی بھاز سرسہب مس۔ اوپارے کہ کورونا تون مون تننگ کن فرنٹ لائن ہیلتھ ورکرآک بے مٹ کاریم کریر۔ چین مدام پاکستان نا کمک ءِ کرے۔ ہڑتوم آ ملک آتا سنگتی بے مٹ ءِ، مشکل حالیت آتیٹی چین نا کمک آ منت وار اُن۔ بنجائی وزیر پارے کہ اولیکو ریسہ ٹی کوویڈ۔ 19 اٹی فرض انا سرتننگ اٹ اختہ فرنٹ لائن ہیلتھ ورکرآتے دا ویکسین ءِ خلنگک۔ بنجائی وزیر اسد عمر پارے کہ ای غٹ وزیراعلیٰ و آزاد کشمیر نا وزیراعظم نا منت واری ءِ ہرفنگ خواوہ و دا دیوان اونا درشانی ءِ کہ ملک آ ہراتم سخت ءُ وخت اس بریک تو غٹ پاکستانیک اواری اٹ کاریم کیرہ۔ اوپارے کہ غٹ صوبہ غاک، آزاد کشمیر، گلگت بلتستان و بنجا اسلام آباد تون اواری اٹ کاریم کرینو و کم و ود اسہ سال اس مسنے و نن مشکل حالیت و گڑتی تا مون ءِ توننگ اٹ سوچ آن جوان بھرم بس۔ اوپارے کہ چینی حکومت و چینی مخلوق نا منت وار اُن ہرافک ویکسینیشن نا داعمل ءِ ممکن کریر۔ اوپارے کہ ویکسین نا دوئی کننگ اٹ وزارت جان جوڑی نا خاص ءُ کڑد اس مسنے۔
