اسلام آباد۔ 03 فروری (اے پی پی) برجامالی سال اٹی پاکستان غٹ آن زیات درآمدات چین آن کرینے۔ ارٹ میکو نمبر آ غٹ آن زیات درآمدات متحدہ عرب امارات آن کننگا وخت اس کہ سنگاپور آن کروک آ درآمدات مسٹ میکو نمبر آ مسنے۔ اسٹیٹ بینک آف پاکستان (ایس بی پی) نا رپورٹ نا رداٹ اینخو مالی سال انا اولیکو ششماہی ٹی جولائی آن دسمبر 2020ء ٹی چین آن 5730.084ملین ڈالر نا درآمدات کننگانے وخت اس کہ تدوک آ مالی سال انا ہنداوخت اٹی چین آن 4878.751ملین ڈالر نا درآمدات کننگاسس۔ ہنداوڑ تدوک آ مالی سال انا مقابلہ ٹی اینخو مالی سال انا اولیکو ششماہی ٹی چین آن کروک آ درآمد آتیٹی 17.44 درسد ودکی ریکارڈ کننگانے۔ ایلو کنڈآ متحدہ عرب امارات آن کروک آ درآمدات ہم 9.39 درسد کمتی اتون 3643.20ملین ڈالر نا مقابلہ ٹی 3300.862ملین ڈالر اسکان کم مس ولے ولدا ہم پاکستان یو اے ای آن ارٹ میکو نمبرآ غٹ آن زیات درآمدات کرینے۔ ایس بی پی نا رداٹ اینخو مالی سال اٹی پاکستان مسٹ میکو نمبر آ غٹ آن زیات درآمدات سنگاپور آن کرینے ہرا تدوک آ مالی سال انا اولیکو شش تُو انا مقابلہ ٹی اینخو مالی سال انا ہنداوخت اٹی 24.05 درسد ودکی اتون 1081.356ملین ڈالر نا مقابلہ ٹی 1341.440 ملین ڈالر اسکان سرمس۔ ہنداوڑ سعودی عرب آن کروک آ درآمدآتیٹی 38.75 درسد و امریکہ غان کروک آ درآمد آتیٹی 1.64 درسد ودکی ریکارڈ کننگانے۔

متعلقہ مضامینمصنف کی طرف سے مزید